काठमाडाैं । नेपाल प्रिमियर लिग (एनपिएल) मा सुदूरपश्चिम रोयल्स लगातार दोस्रो खेलमा विजयी भएको छ । सुदुरपश्चिमले बिहीबार भएको दिनको दोस्रो खेलमा काठमाडौं गुर्खाजलाई ७३ रनले पराजित गर्यो ।
काठमाडौंको भने यो दोस्रो हार हो । यसअघिका २ खेलमा काठमाडौंले १ मा हार र १ मा जित निकालेको थियो ।
सुदूरपश्चिमले दिएको १६८ रनको लक्ष्य पछ्याएको काठमाडौं १५.५ ओभरमा ९४ रनमा अलआउट भयो । सुदूरपश्चिमका युवा स्पिनर नरेन साउदले ५ विकेट लिएपछि काठमाडौं कमजोर स्कोरमा अलआउट भयो ।
काठमाडौंका लागि स्टेफन स्किनाजीले सबैभन्दा बढी ३७ रन जोडे । उनले नरेन साउदको बलमा इशान पाण्डेबाट क्याच हुनुअघि ३३ बलमा ५ चौका र १ छक्का प्रहार गरे ।
ओपनरद्वय माइकल लेभिट ५ रन र शंकर राना ३ रनमा आउट भए ।
भीम सार्की र गेरार्ल्ड इरासमस १०-१० रन जोडेर आउट भए । सुमित महर्जन पनि १४ रन जोडेर आउट भएपछि काठमाडौं दबाबमा आएका थिए ।
प्रतिक श्रेष्ठ ८ रन र कप्तान करण केसी १ रनमा आउट भएपछि काठमाडौं हार नजिक पुगेको थियो ।
बलिङमा सुदूरपश्चिमका नरेन साउदले ५ विकेट लिए । उनले ३.५ ओभरमा १९ रन खर्चिए । अभिनास बोहराले २ विकेट लिए । उनले ३ ओभरमा १ मेडन राख्दा १२ रन मात्र दिए । सुदूरपश्चिमको रनले गति लियो ।