प्रतिकात्मक तस्वीर
गाेरखा । फेसबुकलगायत सामाजिक सञ्जालमा नक्कली खाता बनाई ठगी गर्ने तनहुँ आँबुखैरेनीका १ जना व्यक्तिलाई प्रहरीले पक्राउ गरेको छ । पक्राउ पर्नेमा तनहुँको आँबुखैरेनी गाउँपालिका वडान नम्बर ५ घर भई काठमाडाैंको चन्द्रागिरि बस्ने रुद्रबहादुर गुरुङ रहेकाे काठमाडाैं उपत्यका अपराध अनुसन्धान कार्यालयले पुष्टी गरेकाे हाे ।
गुरुङले नक्कली खाताको दुरुपयोग गर्दै केटी साथीहरू बनाई आफू फ्रान्स–सिङ्गापुरको लाहुरे हुँ, तिमीलाई मन पराउँदछु, बिहे गरी सिङ्गापुर लैजान्छु, सिङ्गापुर लैजानका लागि कागजात बनाउनुपर्छ, त्यसबापत पैसा लाग्छ भन्दै ठगी गरेकाे अनुसन्धानबाट देखिएकाे प्रहरीले जनाएकाे छ ।
उनले आफ्नो हुलिया एवम् परिचय परिवर्तन गरी काठमाण्डौ, चितवनका विभिन्न स्थानमा भेटन डाकी चेक तथा नगरी गरी १६ लाख ८३ हजार ६०० रुपैयाँ र विभिन्न व्यक्तिको नाममा रहेका २६ वटा ई–सेवा वालेटमा १० लाख ९९ हजार ६०० गरी कुल २७ लाख ८३ हजार २०० रुपैयाँ ठगी गरेका थिए ।
ठगीसम्बन्धी कसूरमा आवश्यक अनुसन्धान एवम् कारबाहीका लागि गुरुङलाई जिल्ला प्रहरी परिसर भद्रकाली पठाइएको काठमाडाैं उपत्यका अपराध अनुसन्धान कार्यालयका प्रहरी उपरीक्षक एवम् सूचना अधिकारी काजीकुमार आचार्यले बताए ।