सुर्खेत । राउटे समुदायमा साढे दुइ बर्षको अवधिमा जम्मा २ जनाकाे मात्र जन्म भएकाे छ । उक्त समुदायमा बच्चाकाे जन्म दर कम हुदा संकटमा पर्दै जान थालेकाे सराेकार वाला निकायहरुले जनाएकाे छ ।
अहिले बालबालिका जन्मिने क्रम निकै कम भएको सोसेक नेपालका कार्यकारी प्रमुख हीरासिंह थापा बताए । पछिल्लो साढे दुई वर्षको अवधिमा राउटे समुदायमा २ जना मात्र बालबालिका जन्मनु यसैकाे उदाहरण भएकाे पनि उनले बताए ।
जनसङ्ख्यामा कमी आएसँगै कर्णालीका विभिन्न जिल्लामा फिरन्ते जीवन बिताउँदै आएका राउटे समुदायको अस्तित्व नै सङ्कटमा पर्न थालेको छ ।
राउटे समुदायको उत्थानका लागि काम गर्दै आएको गैरसरकारी संस्था सोसेक नेपालका अनुसार सामाजिक मूल्य मान्यताका कारण पनि राउटेको सङ्ख्या घटिरहेको हाे । राउटेभित्र ३ वटा समुदाय छन् । एउटै समुदायका केटा र केटीको विवाह गर्नु हुन्न भन्ने उनीहरुकाे मान्यता रही आएकाे छ । यसैले धेरै युवायुवतीको विवाह नै हुन सकेको छैन ।
यस्तै श्रीमानकाे मृत्युपछि जतिसुकै उमेरको भए पनि महिलाले विवाह गर्न पाउँदैनन् । अहिले उक्त समुदायमा २३ जना एकल महिला रहेकाे पनि साेरेक नेपालले जानकारी दिएकाे छ । तीमध्ये धेरैजसो २० देखि ३० वर्ष उमेरका रहेका छन् ।
२०७५ सालमा १४९ जना रहेको राउटेको जनसङ्ख्या घटेर अहिले १३५ जनामा झरेको छ । पहिले याे संख्या झन्डै ७०० काे हाराहारीमा रहेकाे थियाे ।
पछिल्लो समय याे समुदायमका मानिसहरुले जाँड–रक्सी खाएपछि लडेर ज्यान गुमाउने क्रम पनि बढेको छ ।