एजेन्सी । कजाकिस्तानमा दुर्लभ मानिने ५०० भन्दा धेरै समुद्री सिल मृत भेटिएका छन् । अक्टोबर २४ देखि नोभेम्बर ७ तारिखसम्म ५३४ वटा मृत सिललाई तटमा ल्याइएको कजाकिस्तानको मत्स्य पालन समितिले जनाएको छ ।
क्यास्पियन सागर ५ देश अजरबैजान, इरान, कजाकिस्तान, रुस र तुर्कमेनिस्तानको सिमानामा रहेको एउटा बन्द समुद्र हो । क्यास्पियन सागरमा रहेका समुद्री सिल सागरको किनारमा आएको प्रदूषण वा रोगका कारण खतरामा परेका कजाकिस्तानका अधिकारीहरूले बताएका छन् ।
सडेको अवस्थामा फेला पारेर ती सिललाई नमूना परीक्षणका लागि प्रयोगशालामा लगिएको र मृत्युको वास्तविक कारणसहितको नतिजा आउन ४ महिना लाग्नसक्ने अधिकारीहरुलाई उद्धृत गरी समाचार संस्था एएफपीले जनाएको छ ।
अन्तर्राष्ट्रिय प्राकृतिक संरक्षण सङ्घले पछिल्ला वर्ष सिलहरूको सङ्ख्या घट्दै गएकाले यसलाई खतरामा परेको प्रजातिको सूचीमा राखेको छ । क्यास्पियन सिल विश्वको सबैभन्दा ठूलो अन्तर्देशीय जलाशयमा रहने एकमात्र स्तनधारी प्राणी हुन् ।
यिनीहरुको सङ्ख्या घट्दै जानुले जैविक विविधता र प्राणीहरूमाथि गम्भीर खतरा उत्पन्न हुने देखाएको जीव वैज्ञानिकहरुले बताएका छन् ।
