प्रतिकात्मक तस्बिर
गोरखा । वैदेशिक रोजगारीको प्रलोभनमा पारेर ५ करोडभन्दा बढी ठगी गरेर फरार भएका ब्यत्तीलाई प्रहरीले कम्बोडियाबाट पक्राउ गरी नेपाल ल्याएको छ ।
इन्टरपोलबाट रेड नोटिस जारी भएका उदयपुर त्रियुगा नगरपालिका–१० का सुजन आचार्य र बिनु शाक्यलाई प्रहरीले कम्बोडियाबाट पक्राउ गरी नेपाल ल्याएको हो ।
वैदेशिक रोजगारीमा सिंगापुर पठाईदिन्छु भनि ४० जना भन्दा बढी व्यक्तिहरूबाट ५ करोड २ लाख ९४ हजार रूपैयाँ ठगी गरी फरार भएका आचार्य र शाक्यलाई अन्तर्राष्ट्रिय स्तरमा खोजतलास एवम् पक्राउ गर्नको लागि नेपाल प्रहरी प्रधान कार्यालय अपराध अनुसन्धान विभाग इन्टरपोल शाखामा अनुरोध गरेको थियो ।
२०८० माघ १९ गते उनीहरू विरुद्ध रेड नोटिस जारी भएको थियो । साथै सुजन विरूद्द २०७९ जेठ १३ गते जिल्ला प्रहरी परिसर काठमाडौंमा विद्युतीय कारोवार सम्बन्धी कसूर मुद्दा दर्ता भएको र २०८० वैशाख २५ गते प्रहरी वृत्त महाराजगंजमा ठगी तथा अपराधिक लाभ सम्बन्धी कसूर मुद्दा समेत दर्ता भएको प्रहरीले जनाएको छ ।
अन्तर्राष्ट्रिय स्तरमा खोजतलास गरी नेपाल फिर्ता ल्याई सम्बन्धित कसूरमा कानूनी कारवाही गराउनको लागि नेपाल प्रहरी प्रधान कार्यालय अपराध अनुसन्धान विभाग इन्टरपोल शाखाबाट इन्टरपोलका सम्पूर्ण सदस्य राष्ट्रहरूलाई पत्राचार गरिएकोमा २०८१ असोज १ गते कम्बोडियाबाट दुवै जनालाई पक्राउ गरिएको र पक्राउमध्ये सुजनलाई नेपाल ल्याइएको हो ।
उनलाई सम्बन्धित कसूरहरूमा कानून बमोजिम कारवाही गराउने प्रयोजनार्थ जिल्ला प्रहरी परिसर काठमाडौंमा बुझाइएको पनि प्रहरीले जनाएको छ ।