बुटवल । बुटवलको सुप्रिम सहकारी ठगी प्रकरणमा राष्ट्रिय स्वतन्त्र पार्टी (रास्वपा) का सभापति एवम् पूर्व गृहमन्त्री रवि लामिछाने र उनका व्यवसायिक साझेदार छविलाल जोशीसहित १२ जना विरुद्ध रुपन्देहीबाट पनि पक्राउ पुर्जी जारी भएको छ ।
सहकारी ठगी प्रकरणमा अनुसन्धानको लागि जिल्ला अदालत रुपन्देहीले बिहीबार उनीहरुविरुद्ध प्रहरीलाई पक्राउ अनुमति दिएको हो ।
पक्राउ पुर्जी जारी भएसँगै अब रवि लामिछानेलाई सुप्रिम सहकारी ठगीको कसुरमा रुपन्देही ल्याउने तयारी प्रहरीले गरीरहेकाे छ ।
प्रहरीले यसअघि छविलाल जोशीलाई रुपन्देही ल्याएर बयान लिइसकेको थियाे । जोशीलाई इलाका प्रहरी कार्यालय बुटवल लगेर अस्ति बुधवार पोखरा फर्काइएको थियो ।
जिल्ला अदालत कास्कीले रवि र छविलाई थप ७ दिन हिरासतमा राख्न अनुमति दिइसकेको छ । कास्कीमा रविको बयान सकिएपछि रुपन्देही लैजाने प्रहरीको तयारी छ ।
यस्तै चितवनको सहारा, वीरगन्जको साना पाइला, काठमाडाैंको स्वर्णलक्ष्मी सहकारीको मुद्दामा पनि उनीहरुमाथि अनुसन्धान हुने प्रहरील स्राेतले जानकारी दिएकाे छ ।