काठमाडाैं । आज बिहान भएकाे सत्तारुढ दलहरुको बैठकले राष्ट्रिय स्वतन्त्र पार्टी (रास्वपा)ले भिड जम्मा पारेर न्याय निरुपणको प्रक्रिया प्रभावित पार्ने काम गरेको निश्कर्ष निकालेकाे छ ।
रास्वपाका पार्टीका सभापति रवि लामिछानेलाई सहकारी ठगी र सङ्गठित अपराध अनुसन्धानका लागि पक्राउ गरेकाे विरोधमा प्रदर्शन गरिरहेका बेला सत्तारुढ दलहरुको बैठकले यस्तो निश्कर्ष निकालेकाे हो ।
प्रधानमन्त्रीकाे सरकारी निवास बालुवाटारमा बसेको सत्तारुढ दलहरुको बैठकले संसदीय छानबिन समितिमा भएका दलहरुले रवि लामिछाने पक्राउको विरोध गर्नु नैतिक नहुने निष्कर्ष निकालेको बैठकपछि एमाले महासचिव शङ्कर पोखरेलले बताए ।
संसदीय छानविन समितिले दिएको प्रतिवेदनको आधारमा संसदले दिएको निर्देशनअनुसार लामिछानेलाई प्रहरी हिरासतमा राखेर अनुसन्धानको काम भइरहेका बेला त्यसलाई प्रभावित पार्ने काम नैतिक हिसाबले पनि उचित नहुने भएकाले त्यसो नगर्न आफूहरुले रास्वपालाई आग्रह गरेको पोखरेलले बताए ।
फौजदारी अभियोगमा छानबिन चलिरहेका बेला सडकबाट प्रभावित गर्न खोज्नु अनुचित भएको सत्तारुढ दलहरुको निष्कर्ष छ ।
