विराटनगर । अनलाइन जुवा खेलाउनेसँग मिलेमतो गरी २५ लाख रुपैयाँ लेनदेन गरेको आरोप लागेपछी मोरङमा कार्यरत प्रहरी उपरिक्षक नवराज कार्की हेडक्वाटर तानिएका छन् । उनी हेडक्वाटर तानिए लगत्तै अन्य ४ जना प्रहरीलाइ पनि कोशी प्रदेश प्रहरी कार्यालय तानिएका छन् ।
अनलाइन जुवा कारोबारीसँग लेनदेन गरेको भेटिएपछि जिल्ला प्रहरी कार्यालय मोरङमा कार्यरत प्रहरी निरिक्षक विक्रमबहादुर भट्टराई, हवल्दार राजकुमार श्रेष्ठ, सहायक हवल्दार सरोज श्रेष्ठ र इलाका प्रहरी कार्यालय बेलबारीमा कार्यरत हवल्दार खगेन्द्र राउत प्रदेश प्रहरी कार्यालय तानिएका हुन् ।
प्रदेश कार्यालयले लेनदेनमा जोडिएका थप प्रहरीमाथि पनि छानबिन सुरु गरेको जनाएकाे छ । प्रदेशमा तानिएका प्रहरी मोरङका घुमुवा प्रहरी (सादा पोसाकमा खटिने) हुन् ।
प्रदेश प्रहरी स्रोतका अनुसार कारोबारी र प्रहरीबीच २५ लाख रुपैयाँ लेनदेन भएको देखिएको थियो । जिल्लाको टोलीले रकम लिएको विषयमा प्रदेशले आन्तरिक छानविन सुरु गरेपछि रकम लिनेले सो रकम फिर्ता गरेको स्रोतको दाबी छ ।