फाईल तस्बिर
एजेन्सी। भारतीय प्रधानमन्त्री नरेन्द्र मोदी रुस भ्रमणमा जाने भएका छन् । यही अक्टोबर २२ देखि २४ तारिखमा रुसको कजान शहरमा हुने ब्रिक्स सम्मेलनमा भाग लिन उनी रुस जान लागेकाे बीबीसी हिन्दीले जनाएको छ ।
प्रधानमन्त्री मोदीले ४ महिनामै दोस्रो पटक रुसको भ्रमण गर्न लागेकाे हो । उनले गएको जुलाईमा पनि रुसको भ्रमण गरेका थिए । रुस भारतका लागि पेट्रोलियम पदार्थ र हतियारको महत्त्वपूर्ण आपूर्तिकर्ता हो । तर युक्रेन युद्धका कारण रुस पश्चिमा देशहरूसँग टाढा भइरहेको र चीनसँगको बढ्दो सम्बन्धले रुस र भारतबीचको सम्बन्धमा प्रश्न उठाएको छ ।
भारतले युक्रेनमा रुसी युद्धको विरोध गरेको छैन । २ देशबीचको युद्धको शान्तिपूर्ण समाधानका लागि मध्यस्थता गर्न भारतले प्रस्ताव गर्दै आएको छ । युरोपमा पुराना खरिदकर्ताहरूले छोडेको अवस्थामा भारत रुसी कच्चा पेट्रोलियम पदार्थको मुख्य ग्राहक बनेको छ ।
मोदीको रुस भ्रमणलाई पश्चिमा सञ्चारमाध्यमहरूले प्राथामिकताका साथ चर्चा गरिरहेका छन् ।
