एजेन्सी । भारतको मुम्बईमा एनसीपीका नेता बाबा सिद्दिकीको गोली हानी हत्या गरिएको छ । गएराति मुम्बईको बान्द्रा पूर्वमा नेता सिद्दिकीमाथि गोली प्रहार भएको थियो । छातीमा गोली लागेर गम्भीर घाइते भएका उनलाई लगत्तै लिलावती अस्पतालमा भर्ना गरिएको थियो ।
छोरा जिशान सिद्दिकीको कार्यालय जाँदै गर्दा आक्रमण भएको र घटनामा संलग्न रहेको आरोपमा २ जनालाई पक्राउ गरिएको मुख्यमन्त्री एकनाथ शिन्देले जानकारी दिएको भारतीय सञ्चारमाध्यमले जनाएका छन् । गोली लागेर ज्यान गुमाएका सिद्दिकी महाराष्ट्रका पूर्व मन्त्रीसमेत हुन् ।
यसै वर्ष गएको फेब्रुअरीमा उनी कांग्रेस छोडेर एनसीपी (अजित पवार गुट) मा सामेल भएका थिए । सिद्दिकी बिगत ४८ वर्षदेखि कांग्रेसमा आबद्ध थिए ।
गोली हानेकाे आरोपमा पक्राउ परेकामध्ये १ जना हरियाणा र अर्का १ जना उत्तर प्रदेशका रहेका छन् । पक्राउ परेकासँग सोधपुछ चलिरहेको प्रहरीले जनाएको छ ।
