मकवानपुर । हेटौंडाबाट करिब १२ कराेड मूल्य बरावरकाे सुन सहित २ जना भारतीयलाई प्रहरीले पक्राउ गरेकाे छ । पक्राउ परेकाहरुबाट प्रहरीले ८ किलोभन्दा धेरै सुन बरामद गरेका जनाएकाे छ । बरामद सुन आजकाे बजार भाउअनुसार ११ करोड ४३ लाख रुपैयाँ पर्ने प्रहरीले जानकारी दिए ।
पूर्व–पश्चिम सडक खण्ड हेटौंडा उपमहानगरपालिका–१५ रातोमाटे चेकपोस्टबाट उनीहरुलाई प्रहरीले शनिबार बिहान सुनसहित पक्राउ गरेकाे हाे ।
बागमती प्रदेश ०२–०४७ प ७५०३ नम्बरको स्कुटरलाई रोकी जाँच गर्ने क्रममा भारत महाराष्ट्र राज्य सांगली जिल्लाका स्कुटर चालक २५ वर्षिय अभिषेक अजिनाथ कुटी र स्कुटरको पछाडि रहेका २७ वर्षिय राहुल भिट्टिहाल पक्राउ परेकाे जिल्ला प्रहरी कार्यालय मकवानपुरले जानकारी दिएकाे छ ।
प्रहरीले उनीहरुकाे शरीर तथा स्कुटर खानतलासी गर्दा भन्सार छलि ल्याएको उक्त परिमाणकाे सुन फेला परेकाे थियाे ।
सुनसहित अजिनाथ कुटी र राहुल भिट्टिहाललाई थप अनुसन्धान तथा कारबाहीको लागी राजश्व अनुसन्धान कार्यालय पथलैया बारा पठाउने तयारी भइरहेको प्रहरीले जनाएको छ ।
