प्रतीकात्मक तस्बिर
काठमाडाैं । नेपाल सरकारबाट इजाजत लिएकाे हतियार अब सार्वजनिक स्थल र सरकारी कार्यालयमा लैजान नपाइने भएको छ । सरकारले एक सूचना जारी गरेर इजाजतप्राप्त यात्रा हतियार नवीकरणका लागि सम्बन्धित कार्यालयमा बाहेक सार्वजनिक स्थल र सरकारी कार्यालयमा लैजान राेक लगाएकाे हो ।
यात्रा इजाजतपत्र प्राप्त हातहतियारसमेत न्यायिक निकाय, संसद् भवन तथा परिसर, हातहतियारको इजाजतपत्र लिएको कार्यालयमा इजाजतपत्र नवीकरणका लागि ल्याउने वा लैजाने प्रयोजनबाहेक अन्यत्र लैजान नपाउने सूचनामा उल्लेख छ ।
मुख्यगरी सरकारी कार्यालय, अस्पताल, विमानस्थल, सार्वजनिक गाडी, धार्मिक तथा शैक्षिक स्थल, सिनेमा हल, व्यावसायिक भवन, हाटबजार तथा शपिङ मल, सभा जुलुस भएको स्थान, पुरातात्त्विक र संरक्षित स्थल, बाल गृह तथा प्रचलित कानूनले निषेधित गरेका अन्य क्षेत्रमा समेत ती हतियार लैजान नपाउने गरी निषेध गरेको गृह मन्त्रालयले राजपत्रमा प्रकाशित गरेको सूचनामा भनिएकाे छ ।
केही महिना अगाडी मेडिकल व्यवसायी दुर्गा प्रसाईंको अङ्गरक्षकले अदालत परिसरमा हतियार लगेको भेटिएपछि सर्वाेच्चले त्यस विषयमा आवश्यक कानून बनाउन आदेश दिएअनुसार सरकारले निर्णय गरी राजपत्रमा सूचना जारी गरेको हो ।