साँकेतिक तस्बिर
बर्दिया । आज बर्दियामा गैंडाको आक्रमणमा परी १ जना नेपालीकाे मृत्यु भएकाे छ भने अर्का १ जना बिदेशी घाईते भएका छन् । मृत्यु हुने नेपाली टुरिस्ट गाइड भएकाे बर्दिया प्रहरीले जनाएकाे छ ।
बर्दिया राष्ट्रिय निकुञ्जको मध्यवर्ती क्षेत्र तथा डिभिजन वन अन्तर्गतको बीचमा पर्ने मधुवन–१ डल्लाको शिव सामुदायिक वनभित्र गैंडा अवलोकनका क्रममा आक्रमणबाट ३६ वर्षीय टुरिस्ट गाइड ठाकुरबाबा नगरपालिका–९ का मनमोहन चौधरीको मृत्यु भएको हो ।
साेही गैंडाको आक्रमणबाट ५६ वर्षीय अमेरिकी पर्यटक सावन मेक लेन्डोन घाइते भएकाे निकुञ्जका सूचना अधिकारी पुरुषोतम वाग्लेले जानकारी दिए ।
गैंडा अवलोकनका लागि आज बिहान टुरिस्ट गाइड मनमोहन चौधरी र विदेशी पर्यटक सामुदायिक वनभित्र गएका बेला बिहान ८ बजेतिर आक्रमणमा परेका थिए । गैंडाले पहिले विदेशी पर्यटकलाई आक्रमण गरी घाइते बनाएपछी उद्धार गर्न गएका टुरिस्ट गाइड चौधरीलाई गैंडाले आक्रमण गरेको प्रहरीले जनाएको छ ।
गैंडाको आक्रमणबाट घाइते भएका विदेशी पर्यटकको खुट्टामा चोट लागेको छ । घाइते पर्यटकलाई उपचारका लागि नेपालगञ्ज पठाइएको छ ।
