सोलुखुम्बु । सोलुखुम्बुको थामेमा गत शुक्रवार खोलामा आएको बाढीले बगाएर बेपत्ता भनिएका ब्यत्ति सकुशल फेला परेका छन् । बाढी आएलगत्तै हराएका ५५ वर्षीय निमानुरु शेर्पा उनकै घरमा थुनिएको अवस्थामा सकुशल भेटिएको जिल्ला प्रहरी कार्यालय सोलुखुम्बुले जानकारी दिएको छ ।
सुन्न र बोल्न नसक्ने शेर्पा भेलबाढीका कारण घरभित्र थुनिएपछि निस्कन र कसैलाई बोलाउन पनि नसकेका कारण बेपत्ता भएको अनुमान गरिएको थियो । बाढी आउनुअघि कसैले घाँस काट्न गएको देखेको र कसैले लुगा बोकेर हिँडिरहेको देखेको बताएपछि बाढीले बगाएको अनुमानमा खोजी सुरु गरीएको थियो ।
शेर्पालाई आइतबार उनकै घरभित्रै बसिरहेको अवस्थामा सकुशल भेटिएको प्रहरीले जानकारी दिएको हो ।
हिमताल फुटेर आएको बाढी र पहिरोले १७ घर र १ विद्यालयलाई क्षतिग्रस्त बनाएको थियो । दिउँसोको समयमा घटना भएकोले मानवीय क्षति हुन नपाएको प्रशासनले अनुमान गरेको छ ।