गोरखा । प्रधानमन्त्री पुष्पकमल दाहाल ‘प्रचण्ड’ गोरखा आउने कार्यक्रम स्थगित भएको छ । नेपाल मगर संघको आजदेखी सदरमुकामा हुने राष्ट्रिय सम्मेलनको उदघाटनका लागि आउने कार्यक्रम स्थगित भएको हो ।
प्रधानमन्त्रीको सचिवालयले दिएको जानकारी अनुसार पूर्व निर्धारित कार्यक्रम स्थगित भएको छ । बढ्दो राजनैतिक घटना क्रमका कारण प्रधानमन्त्रीले राजधानी छाड्न नमिल्ने भएपछी उनी गोरखा आउने कार्यक्रम रद्व भएको सचिवालयले जानकारी दिएको छ ।
यता प्रधानमन्त्री गोरखा आउने कार्यक्रम नभएको प्रमुख जिल्ला अधिकारी भोला दाहालले बताए । प्रधानमन्त्री आउने हो भने हामीलाई पूर्व जानकारी हुन्छ । कुनै पनि जानाकारी नभएको कारण प्रधानमन्त्री गोरखा आउने कार्यक्रम नभएको बताए ।
प्रधानमन्त्री दाहाल संगै उपप्रधान तथा परराष्ट्रमन्त्री नारायणकाजी श्रेष्ठ समेत कार्यक्रममा सहभागी नहुने भएका छन् ।
यता कार्यक्रममा सहभागी हुन प्रतिनिधि सभाका उपसभामुख ईन्दिरा रानामगर भने शुक्रबार नै गोरखा सदरमुकाम आईपुगेको नेपाल मगर संघले जानकारी दिएको छ । नेपाल सरकारका प्रधानमन्त्री र उपप्रधानमन्त्री कार्यक्रममा नआउने भएपछी उपसभामुख रानामगर नै आजको प्रमुख अतिथी हुने भएका छन् ।
आज र भोली हुने राष्ट्रिय सम्मेलन सदरमुकामको गोरखा संग्रालय परिषरमा हुन लागेको हो । ‘आर्थिक समृद्वि र राजनैतिक सशक्तिकरणसहितको सचेत मगर समुदाय निर्माण हाम्रो अभियान १ मगरात सभ्यताको दस्तावेजीकरण र मगरात दर्शन निर्माणको पक्षमा २८औं राष्ट्रिय सम्मेलन११’ सहित गोरखामा दोस्रो पटक सम्मेलन हुन लागेको हो । यस अघि संघले ०५३ साल फागुनमा संघले आफ्नो १५औं राष्ट्रिय सम्मेलन बुंकोटमा सम्पन्न गरेको थियो ।
सम्मेलनमा मगरात सभ्यतासहितको समृद्व मगर समाज निर्माण गर्ने संकल्पसंगै प्रथम शहिद लखन थापालाई राष्ट्रिय विभूति घोषणा गराउन राज्यको ध्यानाकर्षण गराउने, संस्कृती नीति र भाषा आयोगले सिफारीस गरे बमोजिम फरक प्रदेशहरुमा भाषाको प्रयोग सम्वन्धी बृहत छलफल हुने अध्यक्ष पुनमगरले बताए ।
सम्मेलनमा करिब ७०० जनाको सहभागिता रहने संघले जनाएको छ । ७ प्रदेश, ८ भातृ संगठन, १५ भन्दा बढी बैदेशिक शाखा र ७७ जिल्लाबाट उक्त संख्यामा सहभागीहरु गोरखा सदरमुकाम आउने छन् । यसले गोरखाको पर्यटनमा समेत टेवा पुग्ने विश्वास मगर संघले लिएको छ ।
