गोरखा । नेपाल मगर संघको गोरखा सदरमुकाममा हुने कार्यक्रमको सबै तयारी पुरा भएको छ । संघले आज गोरखा सदरमुकाममा गरेको पत्रकार सम्मेलनमा सामान्य काम बाहेकका सबै काम सम्पन्न भएको केन्द्रिय अध्यक्ष ज्ञानेन्द्र पुनमगरले जानकारी दिए ।
सदरमुकामको गोरखा संग्रालय परिषरमा जेठ १२ र १३ गते सम्मेलन हुन लागेको हो । ‘आर्थिक समृद्वि र राजनैतिक सशक्तिकरणसहितको सचेत मगर समुदाय निर्माण हाम्रो अभियान १ मगरात सभ्यताको दस्तावेजीकरण र मगरात दर्शन निर्माणको पक्षमा २८औं राष्ट्रिय सम्मेलन११’ सहित गोरखामा दोस्रो पटक सम्मेलन हुन लागेको हो । यस अघि संघले ०५३ साल फागुनमा संघले आफ्नो १५औं राष्ट्रिय सम्मेलन बुंकोटमा सम्पन्न गरेको थियो ।
सम्मेलनमा मगरात सभ्यतासहितको समृद्व मगर समाज निर्माण गर्ने संकल्पसंगै प्रथम शहिद लखन थापालाई राष्ट्रिय विभूति घोषणा गराउन राज्यको ध्यानाकर्षण गराउने, संस्कृती नीति र भाषा आयोगले सिफारीस गरे बमोजिम फरक प्रदेशहरुमा भाषाको प्रयोग सम्वन्धी बृहत छलफल हुने अध्यक्ष पुनमगरले पत्रकार सम्मेलनमा बताए ।
सम्मेलनमा सहभागीहरु भोली साँझदेखी नै आउने पत्रकार सम्मेलनमा जानकारी गराइएको थियो । सम्मेलनमा सहभागी हुने करिब ७०० जनाको लागि आवासको ब्यवस्था भईसकेको पनि संघले जानकारी दिएको छ ।
७ प्रदेश, ८ भातृ संगठन, १५ भन्दा बढी बैदेशिक शाखा र ७७ जिल्लाबाट उक्त संख्यामा सहभागीहरु गोरखा सदरमुकाम आउने छन् । यसले गोरखाको पर्यटनमा समेत टेवा पुग्ने विश्वास मगर संघले लिएको छ ।
१२ गतेको उद्घाटन कार्यक्रममा प्रधानमन्त्री पुष्पकमल दाहाल ‘प्रचण्ड’, उपप्रधान तथा परराष्ट्रमन्त्री नारायणकाजी श्रेष्ठ र प्रतिनिधी सभाका उपसभामुख ईन्दिरा रानामगरको समेत सहभागीता हुने आयोजक संघले जानकारी दिएको छ ।
उनीहरु १२ गते शनिबार बिहान किमाथान्कामा हुने कार्यक्रम सकेर दिउसो २ बजे गोरखा सदरमुकाम आउने कायक्रम तय भएको छ ।
