गोरखा । गोरखा जिल्लामा कार्यरत ट्राफिक प्रहरीहरुलाई प्रदुषणजन्य रोगबाट जोगित जलनेती तथा नश्यकर्म सम्बन्धी योगाभ्यास तालिम दिइएको छ ।
जिल्ला आयुर्वेद स्वास्थ्य केन्द्र गोरखाको आयोजनामा धुलो, धुवाँ र प्रदुषणजन्य समस्याबाट सुरक्षित रहन सिकाउने उद्देस्यले १ दिन तालिम प्रदान गरिएको केन्द्रका बरिष्ठ कविराज निरीक्षक एवं सूचना अधिकारी कुशलकृष्ण शर्माले बताए ।
‘‘चौविसै घण्टामा सडकमा खटिनुपर्ने ट्राफिक प्रहरीमा श्वासप्रश्वास सम्बन्धी समस्याको जोखिम कम गर्ने उद्देश्यले योगाभ्यास दिएको, भन्दै उनले भने, ‘‘त्यसका लागि जलनेति तथा नश्यकर्म सम्बन्धी योगाभ्यास र प्रयोग लाभदायी हुन्छ ।’’ निरीक्षक शर्माले सडकमा उभिएर ड्युटीमा खटिने ट्राफिक प्रहरीहरुमा स्वासप्रश्वास सम्बन्धी समस्या र प्रदुषणजन्य समस्याबाट सुरक्षित रहनका लागि जलनेति तथा नस्यकर्म सिकाइएको जानकारी दिए ।
‘‘तलिममा सहभागीहरुलाई जलनेती, नस्यकर्म, योग तथा आयुर्वेद मार्फत कसरी सुरक्षित रहन सकिन्छ भन्ने सैदान्तिक ज्ञानसंगै अभ्यास समेत गराएको छ, प्रमुख प्रशिक्षक समेत रहेका निरीक्षक शर्माले भने, ‘‘सिकेका कुरा अब दैनिकरुपमा व्यवहारमा लागू गर्नसके उहाँहरुलाई स्वासप्रवास र प्रदुषणजन्य समस्याबाट जोगिन धेरै सजिलो हुन्छ ।’’
जलनेति तथा नश्यकर्मले टाउको दुख्ने र नाकसम्बन्धी समस्यालाई समाधानका हुन्छ । ‘‘नाक, कान, आँखा, घाँटीसंग सम्बन्धित रोगहरुबाट बच्नका लागि यो अत्यन्तै प्रभावकारी छ, उनले भने, ‘‘त्यसवाहेक आँखाको दृष्टि बढाउन, बिभिन्न प्रकारका टाउको दुखाइ, रुघाखोकी, कहिलेकाँही कान नसुन्ने समस्या भएमा निराकरणमा पनि यसले फाइदा पुग्ने भएकाले यसलाई महत्वपूर्ण मानिन्छ ।’’
सवैका लागि यी कर्म उत्तिकै फाइदाजनक हुने भएपनि विशेषगरी ट्राफिक प्रहरी यस्ता समस्याको जोखिममा हुने भएकाले ट्राफिक प्रहरीका लागि प्राथामिकता दिएर तालिम प्रदान गरिएको हो । ‘‘ट्राफिक प्रहरीलाई धुलो, धुवाँ गाडीको वरपर रहेर दिनभरी काम गर्नुपर्ने बाध्यता हुन्छ, उनले भने, यी आयुर्वेदसम्बन्धी कर्म दैनिक रुपमा गर्ने हो भने धेरै प्रकारका रोगहरुबाट उहाँहरु सुरक्षीत रहन सक्नुहुन्छ ।’’