गोरखा । उत्तरी गोरखामा पर्यटक र पशु चौपायाले दुःख दिने भुस्या कुकुरको ब्यवस्थापनलाई थप प्रभावकारी बनाइने भएको छ । सिर्दीबासमा हालै सम्पन्न जिल्ला बन्यजन्तु अपराध नियन्त्रण समितिको बैठकले उक्त निर्णय गरेको चुमनुब्री गाउँपालिकाका अध्यक्ष निमा लामाले बताए ।
‘पर्यटक र घर पालुवा पशुहरुलाई टोकेर दुःख दिने भुस्या कुकुरको बन्ध्याकरणको पहिलो चरणको काम भईरहेको छ’ उनले भने ‘काम प्रभावकारी देखिएको गाउँपालिकाले नै जिम्मेवारी लिएर कुकुरको थप ब्यवस्थापनमा लाग्ने छौ ।’
समितिको बैठकले पनि मनासलु संरक्षण क्षेत्रमा बन्यजन्तुको चोरीशिकार र आखेटापहारको अबैध ब्यापारको नियन्त्रणका सम्बन्धमा ब्यापक छलफल भएको र यस क्षेत्रमा रहेका बन, बन्यजन्तु लगायतका प्राकृतिक श्रोतको संरक्षणका लागि सरोकारवालाहरु बिच समन्वयात्मक ढंगबाट कार्यक्रमहरु संञ्चालन गर्ने निर्णय भएको मनासलु संरक्षण क्षेत्र आयोजनाका संरक्षण अधिकृत एवं सूचना अधिकारी भूवनराज ओझाले जानकारी दिए ।
पहिलो चरण अन्तरर्गत २०८० साल चैत्र २९ गतेबाट सुरु भएको कुकुरहरुको बध्याकरण र भ्याक्सीन लगाउने काम चुम भ्यालीको चुम्चेत र छेकम्पार तथा वरपरका क्षेत्रमा आज सम्पन्न भएको पनि सूचना अधिकारी ओझाले जानकारी दिए ।
उनका अनुसार उक्त क्षेत्रमा १५० वटा कुकुरलाई भ्याक्सीन लगाईएको छ भने ५६ वटा कुकुरलाई बध्याकरण गराउने काम सम्पन्न भएको छ । कार्यक्रम अन्तरर्गत सो क्षेत्रमा फेला परेका सबै कुकुरलाई भ्याक्सीन लगाईने छ भने बध्याकरण भने कुकुर धनीको अनुमती मात्र गरिएको छ ।
यो अभियानमा चुमनुब्री गाउँपालिकाले ३ लाख, मनासलु संरक्षण क्षेत्र आयोजनाले ३ लाख ५० नगदै सहयोग उपलब्ध गराएको छ भने हेल्प नेपालले आवास र खानाको गरी ४ लाख रुपैयाँ सहयोग गर्ने छ ।
यता भेटरीनरी अस्पताल तथा पशु सेवा बिज्ञ केन्द्र गोरखाले भने २ लाख बरावरको भ्याक्सीन सहयोग गरेको छ । एनिमल नेपालको प्राविधिक तथा चिकित्सकीय सहयोगमा कुकुरलाई बध्याकरण र भ्याक्सीन दिने गरिएको छ ।
अभियान अन्तरर्गत आजदेखी उक्त टोली नुब्री भ्याली तर्फ गएका छन् । नुब्री भ्यालीको बिही, प्रोक, ल्हो र सामागाउँमा रहेका कुकुरलाई भ्याक्सीन लगाउने र बध्याकरण गर्ने काम हुने छ ।
यो अभियान बैशाख अन्तिम सातासम्म सञ्चालनमा आउने सूचना अधिकारी ओझाले जानकारी दिए ।