गोरखा । मनकामना दर्शन प्रालिद्वारा सञ्चालित मनकामना केबलकारमा ९ महिनाको अवधीमा ८ लाख २५ हजार यात्रुले यात्रा गरेका छन् । यो आर्थिक बर्षको साउनदेखी चैत्र मसान्तसम्म ९ महिनाको अवधीमा उक्त संख्याका यात्रुहरुले यात्रा गरेको नायब महाप्रबन्धक उज्वल शेरचनले बताए ।
गत बर्षको सोही अवधीमा भने केबलकारको यात्रा गर्नेका संख्या केलब ७ लाख ६० हजार मात्र भएको उनले बताए । ‘अधिल्लो बर्ष कोरोनाका कारणले यात्रुको संख्यामा कमी आएको थियो’ उनले भने ‘यो बर्ष त्यस्तो केही समस्या आएन । त्यही भएर यात्रुको संख्यामा बढोत्तरी भएको हो ।’
चितवनको चेरेशमा रहेको स्टेशनबाट गोरखाका ऐतिहासिक तथा पुरातात्विक एवं धार्मिक तिर्थ स्थल मनकामना मन्दिरसम्म जान प्रयोग हुने गर्दछ । मन्दिरसम्म जान सबैभन्दा छोटो दुरी भएको तथा बालबच्चा र बृद्वबृद्वालाई सहज यात्रा गर्न पनि केबलकारको प्रयोग हुदै आएको छ ।
तिर्थयात्रीहरुकोलागि मुख्य सिजन मानिने असोजदेखी असारसम्म केबलकार यात्रा गर्नेको संख्या अत्याधिक रहने गर्दछ । यो सिजनमा दैनिक जसो ५ हजारभन्दा बढी यात्रीले केबलकारको यात्रा गर्ने गर्दछन् ।
नेपाल बाहेक भारतीय तिर्थयात्रीहरुको प्रमुख रोजाईमा परेको केबलकारमा यो अवधिमा २ लाख २० हजारभन्दा बढी भारतीयले केबलकारको यात्रा गरेको नायब महाप्रबन्धक शेरचनले जानकारी दिए । सोही अवधीमा ४ हजार बिदेशी तथा ६ लाख १ हजार नेपालीले केबलकारको यात्रा गरेका छन् ।
अधिल्लो आर्थिक बर्षमा ११ लाख १२ हजार जनाले यात्रा गरेको केबलकार यो बर्ष भने १२ लाखभन्दा बढीले यात्रा गर्ने अनुमान गरिएको नायब महाप्रबन्धक उज्वल शेरचनले बताए । ‘कोरोना कारण मनकामना मन्दिर आउनेको संख्यामा कमी आएको थियो’ उनले भने ‘यो बर्ष त्यो संख्या बढेर १२ लाख माथी पुग्ने अनुमान गरिएको छ ।’
आर्थिक बर्ष ०७५–०७६ मा भने ११ लाख ६६ हजार ३० जनाले केबलकारको यात्रा गरेको केबलकार प्रशासनले जानकारी दिएको छ ।
तिर्थ यात्री र पर्यटकको रोजाईमा परेको केबलकारले यात्रुको सुविधाकोलागि बर्षे नयाँ नयाँ प्रविधि प्रयोगमा ल्याउन थालेको छ । यो बर्ष भने एनालग प्रविधीबाट सञ्चालमा आएको केबलकार डिजिटल प्रविधिमा रुपान्तरण हुने भएको छ । जसकोलागि विदेशबाट प्राविधिक आउने र २ महिना सेवा बन्द गरेर कामको थालनी हुने पनि नायब महाप्रबन्धक शेरचनले जानकारी दिए ।