गोरखा । गोरखामा बिद्युतीय गाडी सञ्चानलमा आएका छन् । गोरखा दरौंदी यातायात कम्पनी सेवा प्रालिले १० वटा बिद्युतीय माइक्रो बसमार्फत सार्वजनिक यातायातको सेवा दिन सुरु गरेको हो ।
कम्पनीले गएको चैत्र ७ गतेदेखी गोरखादेखी काठमाडौंसम्मका लागि उक्त संख्यामा बिद्युतीय माइक्रो सञ्चालनमा ल्याएको अध्यक्ष नारायण खत्रीले बताए । ‘समय अनुसार यात्रुहरुलाई सेवा दिन आवश्यक छ’ उनले भने ‘अहिलेको समय बिद्युतीय सवारीको समय भएकाले लगानी कर्ताहरुले पनि यसैमा चासो राखेर सञ्चालनमा ल्याएको हो ।’
कम्पनीमा बिद्युतीय माइक्रो सेवाका लागि ५१ जनाले निवेदन दिएको भएता पनि पहिलो चरणमा १० वटा मात्र राख्ने निर्णय भए अनुसार गोलाप्रथा द्वारा १० जना ब्यवसायीहरुलाई सञ्चालनको अनुमती दिएको पनि अध्यक्ष खत्रीले जानकारी दिए ।
अध्यक्ष खत्रीका अनुसार यातायात ब्यवसायीहरुले पहिलो चरणमा ७ करोड २९ लाख खर्चेर माइक्रो खरिद गरेको बताए । ‘५० र ७० किलोवाटको गाडी मध्ये हामीले ७० किलोवाटको गाडी खरिदका लागि अनुमती दिएका हौ’ उनले भने ‘यसमा यात्रुहरुलाई धेरै सुविधा रहेकोले यात्रुहरुको चाप पनि बढेको छ ।’
सञ्चालनमा आएका सबै माइक्रोमा बातानुकुलित तथा यात्रीको सुरक्षाकालागि अग्रभागमा २ वटा एयर ब्याग समेत रहेको छ । माइक्रो १ पटक पूर्ण चार्ज हुदा ३०० किलोमिटर गुडन सक्ने भएका कारण यात्रुले सहज रुपमा गोरखा–काठमाडौं–गोरखाको यात्रा गर्न सक्ने कम्पनीले जनाएको छ ।
त्यसका साथै नयाँ माइक्रोमा फराकिलो भाग, आपतकालिन ढोका, अग्लो भित्री भागका साथै यात्रु सिट सिंगलसिंगल र फोल्डीङ छन् ।
हाल कम्पनीले बिद्युतीय माइक्रो सहित गोरखा–काठमाडौं ४९ वटा माइक्रो सञ्चालनमा ल्याएको छ । बाँकी ३९ माइक्रो १९ बर्ष पारगरेकोले अब पुरानो माइक्रोको साटो पनि बिद्युतय माइक्रो नै सञ्चालनमा ल्याउने अध्यक्ष खत्रीले जानकारी दिए ।
कम्पनीले गोरखा–काठमाडौंका लागि हायसको डिजल गाडी सञ्चालन गर्दै आएको थियो । सोही मोडलमा देखिने हाइगर बिद्युतीय गाडी ब्यवसायीलाई कम्पनीले सिफारीस गरेको हो । ब्यवसायीहरुले प्रति गाडी ७२ लाख ९० हजार हालेर खरिद गरेका हुन् ।
१५ सिट क्षमताको उक्त गाडीमा सह चालक सहित १६ जनाभन्दा बढी सवारी नगराउन पनि कम्पनीले ब्यवासायीहरुलाई सचेत गराएको छ ।
नयाँ माइक्रोले अहिले बुंकोट, घ्याम्पेशाल, चित्रेपोखरी, पालुङटार र नयाँसाँघु सेवा दिन सुरु गरेको र अन्य ५ नयाँ स्थानबाट पनि सञ्चालनको तयारी भईरहेको कम्पनीले जानकारी दिएइको छ ।
ससिला मोटर्सले उपब्ध गराएको उक्त माइक्रोकोलागि चार्जिङ स्टेशनकालागि २ थान चार्जर निशुल्क उपलब्ध गराएको छ । उक्त चार्जर उपयुक्त स्थानमा राखी चार्जिङको ब्यवस्था पनि छिटै सञ्चालनमा आउने कम्पनीले जनाएको छ ।