गोरखा । उत्तरी गोरखाको धार्चे गाँउपालिकामा रहेको रुन्चेत गाउँ जान झोलुङेपुल निर्माण कार्य सुरु गरिएको छ । झोलुङे पुल निर्माण संगै रुन्चेतबासीलाई २ घण्टाको दुरी कम हुने भएको छ ।
पुल निर्माणको लागि आर्थिक तथा प्राविधिक सहयोग कादुरी नेपाल नामक संस्थाले सहयोग गरेको हो । ठुलो बस्ती रहेको रुन्चेतबासीले अहिले माछाखोला पारीको बाटो प्रयोग गर्दै आएको छ । यो पुल निर्माण संगै अब भने २ घण्टाको दुरी कम हुने स्थानिय सार्की गुरुङले बताए ।
‘अहिलेसम्म हामीले माछाखोला–लामाबेशी–केरौजाबेशी हुदै रुन्चेत जाने गरेका थियौ’ गुरुङले भने ‘अब यो झोलुङे पुल बनेपछी भने सबैभन्दा छोटो बाटो भएर गाउँ जान पाउछौ ।’ उनका अनुसार यो पुल बनेसंगै ३ घण्टाको दुरी छोटीएर १ घण्टामा नै गाँउ पुग्न सकिने छ ।
धार्चे गाँउपालिका प्रमुख प्रशासकीय अधिकृत काजीमान सुनारका अनुसार रुन्चेत बासीले अहिले प्रयोग गर्दैै आएको पदमार्ग असुरक्षित छ । बाटोमा भिरबाट ढुङ्गा खस्ने तथा सारै भिरालो छ । अब बन्ने पुलले भने त्यहाँका स्थानियलाई ठुलो राहत हुने उनले बताए ।
पुल धार्चे गाउँपालिकाको वडा नम्बर २ र ३ को बिचमा बन्न लागेको हो । कादुरीका प्राविधिक तथा स्थानियहरुले अहिले भिरमा ढुङ्गा फोर्ने काम गरी रहेका छन् । फेब्रवरी १५ अर्थात फागुन १५ गतेदेखी सुरु भएको काम जुन १५ अर्थात असार १ गते सम्पन्न गर्ने गरी काम भई रहेको कादुरीका प्रोजेक्टर मेनेजर प्रदिपकुमार सिलवालले बताए ।
सिलवालका अनुसार अहिले कादुरीका ६ जना बिज्ञ सहितको टोली र केही स्थानियले भिरमा काम गरीरहेका छन् । काम चाढो गरेर पुल सम्पन्न गर्ने तर्फ कादुरीको ध्यान रहेको पनि उनले बताए ।
कादुरीले दिएको जानकारी अनुसार पुलको लम्बाई १२२ मिटरको रहेको छ । वारी लुसी ट्याङ र पारी रुन्चेतको बेशी जोडने गरी कादुरीले १ करोड ३२ लाख रुपैयाँ पुलको लागि आर्थिक सहयोग उपलब्ध गराएको छ भने स्थानियले १ लाख ७६ हजार बरावरको श्रमदान गर्ने पनि छ ।
स्थानियको माग अनुसार नै अहिले उक्त स्थानमा पुलको काम सुरु गरीएको हो । कादुरीले उत्तरी गोरखामा बिद्युत, बाटो, झोलुङे तथा फलामे पुल तथा खानेपानी तथा हाइड्रो पावर निर्माणमा सहयोग गर्दै आएको छ ।
३०० घरधुरी भन्दा धेरै रहेका रुन्चेतबासीले पुल निर्माण हुनु भन्दा पहिला माछाखोला–लामावेशी–केरौजावेशीको बाटो तथा केरौजासम्म सवारी साधानमा गएर रुन्चेत जानुपर्ने बाध्यता रहदै आएको छ ।