गोरखा । बहुमुल्य र नेपालमा नै ठुलो मानिएको क्वार्ज क्रिष्टल गोरखा दरर्बारमा आज एक कार्यक्रम बिच स्थापना गरिएको छ ।
उक्त क्रिष्टल प्रधानमन्त्री पुष्पकमल दाहाल ‘प्रचण्ड’ले एक कार्यक्रम बिच पृथ्वीनारायण शाहको गद्वी भएको कक्षमा स्थापना गरिएको छ ।
गोरखा नगरपालिका–७ को सतिपीपलस्थित राममाया शाहीको घरबाट बिक्री गर्न लागेको बेला गोरखा प्रहरीले बरामद गरेको थियो ।
राजनैतिक दल, संघ संस्था तथा सर्व साधारणले उक्त क्रिष्टल गोरखामा नै राख्नुपर्ने दवाव दिए संगै उद्योग मन्त्रालयले निर्णय गरेर राख्ने अनुमती दिएको हो ।
क्रिष्टलको एक कार्यक्रम बिच प्रधानमन्त्री प्रचण्डले विशेष पूजाआजा गरेर स्थापना गरेको हो ।
अब उक्त क्रिष्टल सर्व साधारणको लागि हेर्न खुल्ला गरिएको छ । यस अघि भने उक्त क्रिष्टल जिल्ला प्रहरी कार्यालयको एक कक्षमा सुरक्षित राखिएको थियो ।
क्रिष्टललाई प्रहरी कार्यालयबाट गाेरखा दरर्बारसम्म लैजादा झाँकी र बाजागाजा तथा रर्याली गरेर लगिएकाे थियाे ।
क्रिष्टलको सुरक्षाका लागि गोरखा नगरपालिकाले ८ वटा सिसी क्यामेरा जडान गरिदिएको छ भने सुरक्षाको लागि विशेष रुपमा प्रवन्ध मिलाईएको प्रमुख जिल्ला अधिकारी भोला दाहालले जानकारी दिए ।
राजधानीबाट आएको खानी तथा भूगर्भ बिभागको टोलीले परीक्षणपछि उक्त ढुंगा क्वार्ज क्रिष्टल भएको पुष्टि गरेको थियो ।
बिभागबाट आएको भूगर्भविद डा.सुस्मिता भण्डारीले उक्त ढुंगा महत्वपूर्ण र बहुमूल्य रत्नपत्थर भएको पुष्टी गरेकी थिइन ।
संसारभरका धातुलाई कडापनका आधारमा १० समूहमा वर्गीकरण गर्ने गरिएको बताउँदै भूगर्भविद डा.भण्डारीले कडापनका आधारमा उक्त चट्टान ७ औं नम्बरमा रहेको जानकारी गराएकी थिइन । कडापनका आधारमा हिरा १० औं नम्बरमा पर्छ ।
उक्त क्वार्ज क्रिष्टल मुख्य रुपमा गरगहना बनाउन, सजावटका सामग्री बनाउन, घडी, कम्प्युटर, रेडियो ट्रान्समिटर जस्ता विद्युतीय उपकरणहरुमा पनि आंशिक रुपमा प्रयोग हुने गर्दछ ।
उक्त ढुंगाको तौल ५२ किलो ३३० ग्राम रहेको र यति तौलको एउटै चट्टान भेटाउन मुस्किल पर्ने गर्दछ । प्रहरीले गोरखा नगरपालिका–७ सतिपीपलबाट गत असार १४ गते उक्त ढुंगा बरामद गरेको हो ।
