गोरखा । कारागारमा बन्दी जिवन बिताईरहेकाहरुलाई विपरीत परिस्थितीमा पनि कसरी खुशी रहने भन्ने भन्ने बारेमा ३ दिने प्रशिक्षण कार्यक्रम सम्पन्न भएको छ ।
ब्रम्हमाकुमारी ईश्वरीय विश्वविद्यालय गोरखा शाखाको आयोजना तथा जिल्ला प्रहरी कार्यलय गोरखाको समन्वयमा बन्दीहरुलाई सकारात्मक सोचको विकासका साथै विपरित परिस्थितीमा पनि कसरी खुशी हुने भन्ने कला सिकाइएको शाखाकी सञ्चालिका पबिताले जानकारी दिईन ।
कैदीबन्दीहरुमा विगतमा गरेका गल्ती कमजोरीको महसुस गराउदै आफुलाई सुधार गर्दै लैजाने र जटिल परिस्थतीमा पनि खुशी हुन सक्ने क्षमताको विकासका लागि कार्यक्रमको आयोजना गरिएको जिल्ला प्रहरी कार्यालय गोरखाका प्रहरी नायब उपरिक्षक एवं सूचना अधिकारी रमेशकुमार श्रेष्ठले बताए । उनका अनुसार कार्यक्रमबाट उनिहरुमा सकारात्मक सोचको विकास गर्न मद्दत पुगेको विश्वास लिइएको छ ।
प्रशिक्षण कार्यक्रममा कैदीबन्दी र थुनुवाहरुलाई सामाजिक व्यवहार सुधारका लागि मात्र नभएर मानसिक र शारीरिक स्वास्थ्य, सकारात्मक सोच एवंम आत्मिक शान्तिमा ध्यान केन्द्रीत गराउनका लागि पनि आध्यात्मिक प्रवचन दिइएको विद्यालयकी सञ्चालीका पवित्राले जानकारी दिईन ।
‘‘लामो समयसम्म एकै ठाउँमा रहदा उनिहरुमा तनाव, नैराश्यता उत्पन्न हुने, रिस आवेग र प्रतिसोध बढ्दा अपराधिक सोचको विकास हुनसक्ने भएकोले मनमा उब्जने गलत मनोभावनालाई परास्त गर्दै सकारात्मक सोचको विकास गराउनु आवश्यक छ, उनले भनिन, ‘‘त्यसका लागि यस्ता खालका आत्मिक प्रवचन तथा प्रशिक्षणहरु महत्वपूर्ण हुन्छ ।’’
प्रशिक्षक पबित्राले कैदसजाय भुक्तानी गरेर फर्किएपछि उनिहरुले समाजमा आफूलाई असल व्यक्तिको रुपमा कसरी पुनःस्थापित गराउनु सक्नुपर्छ भन्ने बिषयमा समेत कैदीबन्दीहरुलाई प्रशिक्षण दिइएको बताइन ।
‘‘कुनै गल्ती वा कमिकमजोरीका कारण कारागारमा सजाय भोगिरहेका बेला उनिहरुलाई खुशी कसरी रहने भन्ने बारेमा सचेतना यस्ता कार्यक्रम अत्यन्त लाभदायी हुन्छ, उनले भनिन, ‘‘मानिसले हरेक जटिल परिस्थितीमा पनि राजयोगको साधना गर्न सके खुशी हुन र मनमा शान्ति मिल्ने भएकाले पनि कार्यक्रम मार्फत साधना गर्ने विधिका समेतको प्रशिक्षण दिइएको हो ।’’
कार्यक्रममा कारागारमा रहेका १८ जना महिला र ११२ पुरुष गरी कुल १३० जना कैदीबन्दीहरू सहभागी भएका थिए । शुक्रवारदेखि सञ्चालनमा आएको तालिम मंगलबार साँझ सम्पन्न भएको जिल्ला प्रहरी कार्यलय गोरखाले जानकारी दिएको छ ।
