गोरखा । नेपालमा केही साता यता डेंगु महामारीको रुपमा फैलिएको छ । ईपीडीमीयोलोजी तथा रोग नियन्त्रण महाशाखाका (ईडीसीडी) को तथ्याङ्कअनुसार अहिले देशैभर संक्रमितको सङ्ख्या साढे २४ हजार १२ जना पुगेको छ ।
संक्रमण देखिएका जिल्लाहरूमध्ये सबैभन्दा धेरै संक्रमित सुनसरी जिल्लामा पुष्टि भएको छ । सुनसरीमा १३ हजार ५२६ जनामा संक्रमण पुष्टि भएको महाशाखाले जनाएको छ ।
मोरङ जिल्ला दोस्रो स्थानमा देखिएको छ । मोरङमा २ हजार २५४ जनामा संक्रमण पुष्टि भएको छ भने धादिङमा २ हजार १९७ जनामा संक्रमण पुष्टि भएको छ । अहिले यो रोग देशभरका ७५ जिल्लामा देखिएको छ ।
यस्तैगरी, झापामा १ हजार ३६२ जना, काठमाण्डौंमा ४५२ जना, धनकुटामा ३७३ जना, संखुवासभामा ३३४ जना, धनुषामा ३३१ जना, कास्कीमा २७० जना र कैलालीमा २४२ जना संक्रमित फेला परेका छन् ।
कुन प्रदेशमा कति संक्रमित ?
सात प्रदेशमध्ये सबैभन्दा धेरै संक्रमित कोशी प्रदेशमा देखिएका छन् । महाशाखाका अनुसार कोशी प्रदेशमा मात्रै १८ हजार ३१९ जना डेंगु संक्रमण पुष्टि भएको छ । कोशीपछि बाग्मती प्रदेशमा ३ हजार ३१६ जना संक्रमित छन् भने गण्डकी प्रदेशमा ७०६ जनामा संक्रमण पुष्टि भएको छ ।
त्यस्तैगरी, सुदूरपञ्चिम प्रदेशमा ६९२, मधेश प्रदेशमा ५२१, लुम्बिनी प्रदेशमा ४०९ र कर्णाली प्रदेशमा ४९ जनामा संक्रमण पुष्टि भएको महाशाखाको तथ्याङ्कमा उल्लेख गरिएको छ ।
