फाइल तस्बिर
काठमाण्डौं । मलेसियामा जारी चार देश सम्मिलित टी–२० अन्तर्राष्ट्रिय सिरिजमा नेपाली महिला टिमले शनिबार उपाधिका लागि हङकङसँग प्रतिस्पर्धा गर्दैछन् ।
पहिलो चरणमा हङकङलाई पराजित गरेको नेपाल पुनः एक पटक हराएर च्याम्पियन बन्ने लक्ष्यमा रहेको छ ।
मलेसियाको बायुमास ओभलमा अहिले बिहान ११ः४५ सुरु हुने खेलमा हङकङ पनि नेपाललाई हराएर च्याम्पियन बन्ने प्रयासमा रहेको छ ।
सुरुवाती चरणको प्रतिस्पर्धा पछि नेपाल शीर्ष र हङकङ दोस्रो स्थानमा रहँदै एकअर्का विरुद्धको उपाधि भेट पक्का गरेका हुन् ।
नेपाल, मलेसिया र हङकङको समान ४ अंक भए पनि नेटरनरेटमा नेपाल शीर्ष स्थानमा रहँदा हङकङ दोस्रो र मलेसिया तेस्रो स्थानमा रहेको छ । शीर्ष २ टिमले फाइनल प्रतिस्पर्धा गर्ने भएकाले नेपाल र हङकङ भिड्न लागेका हुन् ।
पहिलो चरणको खेलमा नेपालले हङकङलाई ६ विकेट हराएको थियो । हङकङलाई हराउँदा प्लेयर अफ द म्याच बनेकी अलराउन्डर सीता रानामगरले ५ विकेट लिएकी थिइन् ।
