भक्तपुर । भक्तपुरको बाल सुधार गृहबाट २२१ जना नाबालक बन्दी फरार भएका छन् । आइतबार १ जना नाबालक बन्दीको मृत्यु भएपछि अवस्था तनाव ग्रस्त बनेको थियो । सोही मौका छोपी उनीहरु फरार भएका प्रहरीले जानकारी दिएको हो ।
सुधार गृहमा २९६ जना नाबालक बन्दी रहेकामा अहिले प्रहरीको नियन्त्रणमै ४२ जना बालिका र ३३ जना बालक रहेका छन् । १२ जनाको भने अस्पतालमा उपचार भइरहेको छ ।
सुधार गृहबाट फरारहरुको खोजतलास भइरहेको जिल्ला प्रहरी परिसर भक्तपुरका डीएसपी वसन्त पाठकले जानकारी दिए ।
रामेछाप जिल्ला मन्थली नगरपालिका घर भएका १८ वर्षीय कमल बस्नेतको आइतबार बिहान मृत्यु भएपछि सुधार गृहमा आन्दोलन चर्किएको थियो । मृत्तक बस्नेत अदालतको आदेशले २०७७ सालदेखि बाल सुधार गृहमा थिए ।
थुनुवाहरु तोडफोडसहित फरार भएपछि अहिले सो क्षेत्रमा ठूलो संख्यामा प्रहरी परिचालन गरिएको छ ।
