बर्दिया । आफ्नै बुहारीलाई घरदेखी कुट्दै सडकसम्म पुरर्याएका भर्थरी चौधरीलाई प्रहरीले पक्राउ गरेको छ । बारबर्दिया नगरपालिका–११ विजयनगरका ५३ वर्षीय चौधरीलाई प्रहरीले पक्राउ गरेको हो ।
सार्वजनिक स्थलमै बुहारीलाई कुटेको भिडियो सामाजिक सञ्जालमा भाइरल भएको थियो ।
उनले बुहारी २६ वर्षीया प्रमिलालाई घरबाट कुट्दै सडकमा पुर्याएका थिए । बुहारीलाई हात र लात्तीले बेहोस हुने गरी कुटपिट गरेको भिडियो सामाजिक सञ्जालबाट सार्वजनिक भएको थियो ।
कुटपिट नगर भन्दै श्रीमतीलगायत स्थानीय महिलाले रोक्ने प्रयास गरे पनि मदिरा पिएका उनले अरू महिलामाथि पनि आक्रमणको प्रयास गरेका थिए ।
प्रमिलाका श्रीमान् ताप्लेजुङमा मजदुरी गर्न गएको पनि बर्दिया प्रहरीले जानकारी दिएको छ । यसअघि पनि उनले मदिरा पिएर कुटपिट गर्ने गरेको प्रमिलाले प्रहरीमा बताइन् । उनले भनिन्, ‘मेरो शरीरमा निकै चोट लागेकाले दुखी रहेको छ, ससुराले बिनाकारण कपाल लुछ्दै लात्तीले हिर्काउँदै घरबाहिर ल्याएर कुटपिट गर्नुभयो ।’
इलाका प्रहरी कार्यालय बाँसगढीका प्रहरी निरीक्षक सुधीर खड्काले चौधरीले मदिरा पिएर बुहारीमाथि निर्घात कुटपिट गरेको जानकारी दिए ।
