गोरखा । गोरखाको गण्डकी गाउँपालिका–६, भुम्लिचोकस्थित पल्लोटारमा फेला परेको अजिङ्गर चितवनमा लगेर सुरक्षित बासस्थानमा छोडिएको छ ।
सब–डिभिजन बन कार्यालय सिउरेनीटारका प्रमुख बन अधिकृत रविआनन्द गोपाली सहितको बन कार्यालयका कर्मचारीको टोली चितवनस्थित राष्ट्रिय प्राकृतिक संरक्षण कोषमा लगेर छोडेको हो ।
फेला पारिएको क्षेत्रमा सुरक्षित बासस्थान नभेटिएपछि चितवनमा लगेर सुरक्षित बासस्थानमा छोडिएको बन अधिकृत गोपालीले जानकारी दिए ।
गण्डकी गाउँपालिकाको भुम्लिचोक र चितवनको इच्छाकामना गाउँपालिका फिस्लिङ जोड्ने नयाँ बनेको मोटरेबल पुल नजिकै गएको शुक्रबार अर्थात साउन २६ गते गोरखा तर्फको कच्ची सडकमा अजिङ्गर फेला परेको थियो ।
अजिङ्गरलाई उद्धार गरी शुक्रबार नै सब–डिभिजन कार्यालय सिउरेनीटारमा नै राखिएको थियो ।
फेला परेको अजिङ्गर रैथाने हो वा बाढीले बगाएर ल्याएको भन्ने बारेमा यकिन गर्न कठिन भएको उनले बताए । बन अधिकृत गोपाली र बनरक्षक अम्बिका शर्माले लौरोको सहयतामा बोरामा हालेर अजिङ्गरको उद्धार गरेका थिए ।
स्थानीयवासीले पहिलो पटक आफूहरुले यस क्षेत्रमा अजिङ्गर फेला परेको बताएका छन् ।
