गोरखा । गोरखा नगरपालिका–७, सतिपिपलबाट बरामद गरी विशेष सुरक्षाका साथ जिल्ला प्रहरी कार्यालयमा राखिएको ‘क्वार्ज क्रिष्टल’ बहुमुल्य भएको खानी तथा भूगर्भ विभागले पुष्टि गरेको छ ।
विभागबाट गोरखा आएको भूगर्भविद्हरुको टोलीले २ दिन लगायर गरेको परीक्षणबाट उक्त ‘क्वार्ज क्रिष्टल’ बहुमुल्य भएको पुष्टी गरेको हो ।
क्रिष्टको परीक्षण पछि विभागको टोलीले जिल्ला प्रसासन कार्यालय गोरखालाई प्रतिवदेन बुझाएको भूगर्भविद् डा.सुस्मिता भण्डारीले जानकारी दिइन । ‘परीक्षणबाट उक्त ढुङ्गा महत्वपूर्ण र बहुमुल्य रत्नपत्थर क्वार्ज क्रिष्टल भएको पाइयो, उनले भनिन, ‘संसारभरका धातुलाई कडापनका आधारमा १० भागमा वर्गीकरण गरिन्छ, सोही आधारमा बरामद गरिएको ढुङ्गा ७ औं नम्बरमा पर्छ ।’
भूगर्भविद्को टोलीले टल्कने ढुङ्गाको नापतौल लिनुका साथै अन्य विभिन्न प्राविधिक पक्षबारे पनि परीक्षण गरेको भूगर्भविद् डा.भण्डारीले जानकारी दिईन । कडापनका आधारमा हिरा १० औं नम्वरमा पर्ने उनको भनाई थियो । टोलीले गरेको परीक्षणका क्रममा उक्त ढुङ्गाको तौल ५२ किलो ३३० ग्राम रहेको पाइएको छ । यत्ति ठूलो तौलको भएको एउटै चट्टानका भेटाउन समेत गाह्रो पर्ने भूगर्भविद् डा.भण्डारीले बताइन ।
‘क्वार्ज क्रिष्टल’ मुख्य रुपमा सजावटका सामग्री तथा गरगहना बनाउन प्रयोग हुने गरेको भूगर्भविद् डा.भण्डारीको भनाई छ । त्यस्तै रेडियो ट्रान्समिटर, कम्प्युटर, घडी लगायतका अन्य विद्युतिय उपकरणहरुमा पनि क्वार्ज क्रिष्टलको आंशिक रुपमा प्रयोग हुने उनले जानकारी दिइन ।
टल्कने ढुङ्गाको परीक्षण सम्पन्न गरेपछि विभागको टोलीले बुधबार जिल्ला प्रशासन कार्यालयमा गोरखा नगरपालिकाका प्रमुख कृष्णबहादुर राना मगर, प्रमुख जिल्ला अधिकारी दिनेशसागर भुषाल र प्रहरी उपरीक्षक अनुपम श्रेष्ठलाई परीक्षणपछिको अध्ययन प्रतिवेदन बुझाएको हो ।
जिल्ला प्रसासन कार्यालय गोरखाले टल्कने ढुङ्गाको नमुना परीक्षणका लागि खानी तथा भूगर्भ विभागलाई पत्राचार गरेपछि विभागले भूगर्भविद् डा.भण्डारी र दुर्गा बोलाखेको टोली गोरखा आएको थियो ।
अध्ययन टोलीले बरामद गरिएको ‘क्वार्ज क्रिष्टल’ खानी तथा भूगर्भ विभागलाई उपलब्ध गराउन पनि प्रतिवेदन मार्फत सुझाव दिएको छ । खानी तथा खनिज पदार्थ ऐन २०४२ को दफा २५ को उपदफा १ अनुसार खनिज कार्यगर्ने अनुमति नलिई उत्खनन् तथा संकलन गरिएकाले उक्त पत्थर विभागलाई उपलब्ध गराई सहयोग गर्न पत्र माफृत आग्रह गरिएको छ ।
गएको असार १४ गते प्रहरीले उक्त टल्कने ढुङ्गा सतिपिपल स्थित स्थानीयबासी राममाया शाहीको घरबाट बरामद गरेको थियो । टल्कने ढुङ्गा बर्षौदेखि शाही परिवारले घरमा राखेर पुजा गर्दै आएको उनीहरुले दावी गरेका छन् ।
गोरखा नगरपालिका गोरखाका नगरप्रमुख कृष्णबहादुर रानामगरले विभागको टोलीसँगको भेटमा ऐतिहासिक र धार्मिक हिसावले उक्त पत्थरलाई गोरखामै राख्ने व्यवस्था मिलाउन आग्रह गरे । उनले टल्कने ढुङगा गोरखामा राख्नका लागि नगरपालिकाले नेपाल सरकार लगायतका अन्य सम्वन्धित निकायहरुसंग आवश्यक समन्वय गर्ने समेत बताए ।