काठमाडौं । काठमाडौंका ट्याक्सी चालकहरुले आजदेखी पुनः आन्दोलिन सुरु गरेका छन् । उनीहरुले मीनभवन, काठमाडौंको यातायात व्यवस्था विभागको कार्यालय अघिल्तिर ५० भन्दा बढी ट्याक्सी तेर्स्याएर आन्दोलन गरिरहेका छन् ।
नीजि प्रयोगको गाडीले भाडाको काम गर्न बन्द गर्नुपर्ने, नेपाली भूमिमा काम गर्ने भारतीय गाडीलाई निषेध गर्नुपर्ने जस्ता माग राख्दै उनीहरुले स्वतन्त्र संघर्ष समिति गठन गरेर आन्दोलन थालेका हुन् ।
आन्दोलनमा उत्रिएका ट्याक्सी चालक तथा व्यवसायीहरुले काठमाडौं उपत्यकामा ट्याक्सी स्ट्याण्ड व्यवस्थापन गर्न, साँचो खोस्ने तथा चालकलाई दुर्व्यवहार गर्ने काम बन्द गर्न समेत माग राखेका छन् ।
यसका साथै उनीहरुले नेपाली अंक पहिचानसहितको नेपाली संवत् जिपियस नम्बर कायम गर्नुपर्ने माग राखेका छन् भने दुर्घटनामा परी मृत्यु भएमा २५ लाख रुपैयाँ राहत दिनुपर्ने, ट्याक्सी मिटर सिल चुँडिदा गाडी साहु र चालक जेल जानु पर्ने कानून खारेज गर्नुपर्ने आन्दोलनकारीहरुको माग छ ।
आन्दोलनमा उत्रिएका ट्याक्सी चालकहरुले नेपाल भरीको ट्याक्सी भाडा दर एउटै हुनुपर्ने, २६० प्रतिशत भन्सार छुट हुनु पर्ने तथा सेतो, पहेँलो, हरियो, नीलो, रातो र कालो प्लेटको गाडी तथा चालकलाई समान व्यवहार गर्नुपर्ने माग राखेका छन् ।
