जुम्ला । जुम्लाको गुठिचौर गाउँपालिकाले रक्सी पिउन र बिक्री गर्न अनिवार्य कार्ड लिनुपर्ने नियम बनाएको छ । गाउँपालिकाको मदिरा नियन्त्रण कार्यविधि २०८० पारित गरेर कार्ड अनिवार्य गरेको हो ।
गाउँपालिकाले सूचना जारी गर्दै मदिरा सेवन गर्न चाहनेहरु सबैलाई साउन महिना भित्रै कार्ड लिन समेत सूचित गरेको छ । घरमा आएका पाहुनाले रक्सी सेवन गर्न चाहेमा भने अतिथि मदिरा सेवा कार्ड लिनुपर्ने गाउँपालिकाले जनाएको छ ।
रक्सीको बिक्री गर्नेका पनि पालिकाले इजाजत अनिवार्य गर्दै पालिकाले साउन महिना भित्रै इजाजत लिन पालिकाले आग्रह गरेको छ ।
अब गुठिचौर गाउँपालिकामा सार्वजनिक स्थल, विद्यालय, स्वास्थ्य केन्द्र, मन्दिर, सरकारी तथा गैरसरकारी कार्यालयभन्दा ५०० मिटर टाढा मात्र रक्सी पसल खोल्न पाइने भएको छ । तर रक्सी पसलमा अन्य सामान बिक्री गर्न पाइने छैन ।
इजाजत पत्र प्राप्त मदिरा पसल मध्ये थोक बेच्नेले बिहान ७ बजेदेखि बेलुका ५ बजेसम्म र खुद्रा पसलेले भने बेलुकी ६ बजेदेखि राति ९ बजेसम्म मात्र बिक्री गर्न पाउने गाउँपालिकाको सूचनामा उल्लेख छ ।
रक्सी पिउने कार्ड पाएकाहरुले दैनिक १८० मिलिलिटर रक्सी वा एक बोतल बियर मात्र पिउन पाउने छन् ।
पालिकाले पिउने कार्डको लागि वार्षिक ५०० र अतिथि कार्डका लागि प्रत्येक दिन १०० रुपैयाँ तिर्नुपर्छ ।
पालिकाको नियम विपरीत गर्नेलाई पहिलो पटक एक हजार रुपैयाँ जरिवाना गरिने चेतावनी दिइएको छ । सोही व्यक्तिले पटक पटक नियम तोडेमा हरेक पटक दुई हजारका दरले जरिवाना बढ्दै जाने समेत सूचनामा उल्लेख छ ।
मदिरा बिक्री वितरण गर्नेले नियम तोडेमा पहिलो पटक १० हजार र त्यसपछि २० हजारका दरले जरिवाना बढ्दै जाने गाउँपालिकाले जनाएको छ ।