साँकेतिक तस्बिर
सप्तरी । आफ्नै श्रीमतीको हत्या आरोपमा प्रहरीले १ जना पुरुषलाई पक्राउ गरेको छ । ३२ वर्षीया किरणकुमारी चौधरीको हत्या गरेको आरोपमा सम्भुनाथ नगरपालिका–५ मोहनपुर बस्ने ईनरदेव चौधरीलाई प्रहरीले पक्राउ गरेको हो ।
खाना खाई आफ्नो कोठामा सुतेकी किरणकुमारी बेहोस अवस्थामा फेला परी तत्काल उपचारको लागि कठौनास्थित कृष्ण अस्पतालमा लगिएकोमा उपचारको क्रममा मृत्यु भएको थियो ।
घटनाको अनुसन्धानबाट मृक्तकका श्रीमान ईनरदेवको संलग्नता देखिए पछि प्रहरी चौकी कठौना र ईलाका प्रहरी कार्यालय कल्याणपुरबाट खटिएको प्रहरीको टोलीले ईनरदेवलाई पक्राउ गरेको हो ।
ईनरदेवले प्रहरीको प्रारम्भिक सोधपुछका क्रममा श्रीमती हत्यामा आफ्नो संलग्नता स्विकार गरेको पनि सप्तरी प्रहरीले जानकारी दिएको छ ।
घटनाका सम्बन्धमा प्रहरीले अन्य आवश्यक अनुसन्धानहरु सुरु गरेको जनाएको छ ।
