साँकेतिक तस्बिर
ललितपुर । ललितपुरको ईमाडोलबाट नक्कली नेपाली नोटसहित १ जना युवकलाई प्रहरी पक्राउ गरेको छ । पक्राउ पर्नेमा मकवानपुर जिल्ला मकवानपुरगढी गाउँपालिका–१ स्थायी घर भएका ४२ वर्षीय प्रशान्त भन्ने पासाङ भोम्जन भएको प्रहरीले जानकारी दिएको हो ।
भोम्जनलाई प्रहरीले ललितपुर महानगरपालिका–४ ईमाडोलबाट ५०० रुपैयाँ दरका १६० थान नक्कली नोटसहित प्रहरीले पक्राउ गरेको जनाएको छ ।
काठमाडौ उपत्यकाको विभिन्न स्थानहरुमा नक्कली नोटहरुको कारोबार भइरहेको छ भन्ने विशेष सूचनाको आधारमा काठमाडौं उपत्यका अपराध अनुसन्धान कार्यालय मिनभवन काठमाडौंबाट खटिएको प्रहरीको टोलीले उनलाई उक्त नक्कली नोटसहित फेला पारी पक्राउ गरेको थियो ।
उनलाई थप अनुसन्धान तथा कारबाहीको लागि जिल्ला प्रहरी परिसर ललितपुर पठाइएको पनि प्रहरीले जनाएको छ ।
