काठमाडौं । मनसुन देशभर फैलिने क्रममा रहेको जल तथा मौसम विज्ञान विभाग, मौसम पूर्वानुमान महाशाखाले जनाएको छ ।
मनसुन क्रमिक रूपमा फैलिरहेको र यो देशभर विस्तार हुन अझै एक साता लाग्ने महाशाखामा मौसमविद् रोजन लामिछानेले जानकारी दिए ।
‘मनसुन सुस्त गतिमा छ, पश्चिमतिर फैलिन अझै केही दिन लाग्छ, मनसुन प्रणाली केही मात्रामा कमजोर रहे पनि वर्षा भने निरन्तर हुनेछ,’ उनले भने ।
साथै यो वर्ष सरदरभन्दा कम वर्षा हुने महाशाखाले जनाइएको छ। नेपालमा सरदर जुन १३ मा मनसुन भित्रिने। यसपाली एकदिन ढिला गरी मनसुन प्रवेश गरेको छ ।
हाल देशको पूर्वी तथा मध्य भू-भागमा मनसुनी प्रणालीको प्रभाव रहेको छ भने बाँकी भू-भागमा स्थानीय वायु र पश्चिमी वायुको आंशिक प्रभाव रहेको छ ।
यसै कारण देशका मध्य तथा पूर्वी भेगमा बदलीसँगै हल्कादेखि मध्यम वर्षाको सम्भावना रहेको र अहिले कोशी, बागमती र गण्डकी प्रदेशका कतिपय स्थानमा वर्षा भइरहेको छ ।
गत बुधबार नेपालको पूर्वी भेग भएर मनसुन प्रणाली भित्रिएको थियो । देशको कोशी प्रदेश, मधेस प्रदेशको पूर्वी भू-भाग, बागमती प्रदेशको अधिकांश भू-भाग र गण्डकी प्रदेशका पूर्वी भू-भागमा मनसुन आगमन भएको महाशाखाले जनाएको छ ।
