साँकेतिक तस्बिर
कैलाली । गौरीगंगा नगरपालिकामा आफ्नै बुहारीको हत्या गरेको आरोपमा सासुससुरालाई प्रहरीले पक्राउ गरेको छ । पक्राउ पर्नेमा गौरीगंगा नगरपालिका–१ गोप्का बस्ने ५२ वर्षीय डिल्ली सिंह बुढा र उनकै श्रीमती ५० वर्षीया लहरी बुढा भएको कैलाली प्रहरीले पुष्टी गरेको हो ।
पक्राउ परेकाहरुले आफ्नै २७ वर्षीया बुहारी कौशी भन्ने कबिता बुढाको हत्या गरेको अभियोग लागेको छ ।
कबिता जेठ १८ गतेबाट हराएको भन्ने निवेदनका आधारमा जिल्ला प्रहरी कार्यालय कैलालीबाट खटिएको प्रहरीहरुको टोलीले खोजी गर्ने क्रममा हत्या गरी गौरीगंगा नगरपालिका–१ केदारेश्वर सामुदायिक बन स्थित सुख्खा नालामा खाल्डोमा गाडेको अवस्थामा शव फेला परेको थियो ।
घरको काम नगर्ने, आफुखुशी गर्ने भन्ने कुरामा विवाद हुँदा भान्सा कोठामा रोटी पकाउँदै गरेकी कबितालाई डिल्लीले टाउकोमा चिरपट दाउराले प्रहार गरी हत्या गरेको अनुसन्धानमा खुल्न आएको कैलाली प्रहरीले जनाएको छ ।
हत्या पश्चात डिल्ली र उनकै श्रीमती लहरी मिलेर लाशलाई डोकोमा हाली बनमा लगि गाडेको प्रारम्भिक अनुसन्धानबाट खुल्न आएको थियो । घटना पश्चात बेपत्ता भएका लहरीलाई गत मंगलबार र डिल्लीलाई भजनी नगरपालिका–३ सीमावर्ती क्षेत्रबाट शनिबार प्रहरीले पक्राउ गरेको हो ।
साथै आरोपित डिल्लीलाई लुकाई छिपाई राख्न सहयोग गर्ने भजनी नगरपालिका–४ बस्ने ४१ वर्षीय जयबीर बुढालाईसमेत प्रहरीले पक्राउ गरेको छ ।
पक्राउ परेका सबै उपर आज जिल्ला अदालत कैलालीमा ज्यान मार्ने मुद्दा दर्ता गरी थप अनुसन्धान सुरु गरिएको प्रहरीले जनाएको छ ।
