एजेन्सी । केन्याको क्रिस्चियन डूम्सडे कल्ट अर्थात प्रलयको दिनमा विश्वास राख्ने सम्प्रदायका मानिसहरुले सामूहिक ‘आत्महत्या’ का छन् । केन्या सरकारका अनुसार हालसम्म सामूहिक आत्महत्या गर्नेहरु मध्ये २०१ को शव उत्खनन् गरिएको छ ।
घटना भएको स्थानमा ६०० भन्दा बढी मानिसहरु सम्र्पक बिहिन भएका केन्या प्रहरीले बताइएको भन्दै अन्तराष्ट्रिय समाचार एजेन्सीहरुले जनाएको छ । यस सम्प्रदायसँग सम्बद्ध व्यक्तिहरूका अनुसार सबैभन्दा पहिला बालबालिकालाई भोक भोकै मारिएको थियो । शनिवार मात्रै प्रहरीले थप २२ जनाको शव उत्खनन् गरेर निकाल्न सफल भएका थिए ।
सञ्चारकमीहरूसँग कुरा गर्दै स्थानीय आयुक्त रोडाह ओन्यान्चाले भने, ‘हाम्रो फरेन्सिक टोलीले आज २२ वटा शव निकालेको छ तर हामीले कसैलाई पनि जीवित फेला पारेका छैनौँ ।’
केन्याको दक्षिण–पश्चिमी क्षेत्रमा अवस्थित शाकाहोला जङ्गलमा सामूहिक आत्महत्याको यो घटना भएको हो । प्रहरीले अहिले पनि यहाँ खोजी कार्य जारी राखेको छ ।
यस सम्प्रदायसँग सम्बन्धित एक डेपुटी पास्टरले लन्डनको टाइम्स पत्रिकालाई यो सामूहिक आत्महत्याको धेरै चरणहरूमा योजना बनाएको बताएका छन् । यी पास्टरले अहिले प्रहरी अनुसन्धानमा सहयोग गरिरहेका छन् ।
पास्टरका अनुसार सबैभन्दा पहिला बालबालिकालाई भोको राखेर मारियो । त्यसपछि महिलाले आत्महत्या गरे अनि पुरुषले ज्यान दिए । अन्त्यमा सम्प्रदायका नेता पास्टर पल म्याकेन्जीको परिवारले आत्महत्या गरे ।
पल म्याकेन्जी हाल प्रहरीको हिरासतमा छन् । प्रहरीले केही शवका पोस्टमार्टम गरेको छ । मारिएका मानिसमा भोक, सास फेर्न नसकेको र कुटिएको सङ्केत भेटिएको छ ।