काठमाडौं । सेतो मच्छिन्द्रनाथको रथयात्रा आज सुरु हुँदैछ । रथजात्रा मुल व्यवस्थापन समितिका अनुसार सेतो मच्छिन्द्रनाथको रथ साँझ ५ बजे जमलको तीनधाराबाट तानेर शहरका विभिन्न स्थान लगिनेछ ।
बुधबार महिलाले मात्रै रथ तानेर रत्नपार्क हुँदै भोटाहिटीसम्म पुर्याउने छन् । बिहीबार रथलाई असनसम्म तानिन्छ । तेस्रो दिन मरुहिटी र जैसीदेवल हुँदै रथ लगनटोल पुर्याइनेछ ।
उपत्यकाका वृद्धवृद्धालाई दर्शन गराउन रथलाई नगर परिक्रमा गराउने परम्परा अनुसार रथयात्रा गर्ने गरिएको हो ।
वर्षा र सहकालका देवता मानिने सेतो मच्छिन्द्रनाथलाई जनबहालबाट नगरपरिक्रमा गराई जमलमा बनाइएको रथमा प्रतिस्थापन गराइएपछि नगर परिक्रमा गर्ने प्रचलन छ ।
अन्तिम दिन लगनटोलस्थित मच्छिन्द्रनाथकी आमालाई ३ पटक परिक्रमा गराएपछि रथयात्रा सम्पन्न हुन्छ । सेतो मछिन्द्रनाथको दर्शन गरे सुख, सुस्वास्थ्य र दीर्घायु प्राप्त हुने विश्वास छ ।