चितवन । गैंडाले आक्रमण गर्दा आज बिहान चितवनमा १ जनाको मृत्यु भएको छ । मृत्यु हुनेमा रत्ननगर नगरपालिका–९ का ६० वर्गीय चन्द्रबहादुर तामाङ रहेको चितवर प्रहरीले पुष्टी गरेको छ ।
चितवन राष्ट्रिय निकुञ्ज कार्यालयका अनुसार बिहान सबेरै उनलाई गैंडाले आक्रमण गरेको निकुञ्जका सूचना अधिकारी सहायक संरक्षण अधिकृत गणेशप्रसाद तिवारीले जानकारी दिए ।
रत्ननगरको लालपर्सा र मोहनाको बीचमा पर्ने बाटोमा उनलाई गैंडाले आक्रमण गरेको थियो । उक्त ठाउँ जंगलबाट निस्केका गैंडा ओहोरदोहोर गर्ने बाटो भएको निकुन्जले जानकारी दिएको छ ।
प्राय उक्त स्थानमा २ वटा गैंडा देखिने गरेको भन्दै सबैलाई सावधानी अपनाउन पनि निकुन्जले अपिल गरेको छ ।
निकुञ्ज आसपासको गाउँ, बस्ती, खेत र वन क्षेत्रमा वन्यजन्तुले बर्सेनि मान्छेलाई आक्रमण गर्दा अंगभंग हुने र ज्यानसमेत जाने घटना हुने गरेका छन् ।
निकुञ्जले दिएको जानकारी अनुसार यो वर्षमा यो सहित वन्यजन्तुले आक्रमण गर्दा ५ जनाको मृत्यु भएको छ ।
