एजेन्सी । भारतीय अर्बपति गौतम अडानी विश्का १० सर्वाधिक धनी व्यक्तिहरुको सूचीबाट बाहिरिएका छन् ।
जनवरी महिनामै ३६ अर्ब अमेरिकी डलरभन्दा बढी सम्पति गुमाएपछि अडानी ब्लुमबर्गले जारी गर्ने विश्वका सर्वाधिक धनीहरुको सूचीमा ११औं स्थानमा झरेका हुन् ।
अमेरिकी ‘सर्ट सेलर’ ‘हिन्डेनबर्ग रिसर्च’ ले गत साता सार्वजनिक गरेको एक रिपोर्टपछि अडानी समूहका कम्पनीको सेयरमा भाउमा भारी गिरावट आएको थियो ।
जसका कारण गौतम अडानीको नेटवर्थ पनि संकुचित हुँदै ८४.४ अर्ब डलरमा सीमित भएको छ । एक साताको अन्तरालमै अडानी विश्वको तेस्रो धनी व्यक्तिबाट ११औं स्थानमा झरेका हुन् ।
सन् २०२२ मा अडानीको सम्पति सबैभन्दा धेरै करिब ४० अर्ब डलरले बढेको थियो । यद्दपि, हिन्डेनबर्गको रिपोर्टपछि उक्त वृद्धि यस वर्षको पहिलो महिनामै लगभग सबै गुम्ने अवस्थामा पुगेको हो ।
सम्पतिमा ठूलो गिरावट भोगेपनि अडानी एसियाकै सर्वाधिक धनी व्यक्तिको रुपमा भने कायमै रहेका छन् । भारतका अर्का अर्बपति मुकेश अम्दानी भने अडानी भन्दा १ स्थान तल १२औं नम्बरमा रहेका छन् ।