काठमाण्डाै । अमेरिकाबाट शङ्कास्पद रकम भित्र्याएको आरोपमा नेपाल राष्ट्र ब्यांकले छानबिन गरिरहेका पृथ्वीबहादुर शाहलाई प्रहरीको केन्द्रीय अनुसन्धान ब्यूरो (सीआईबी) ले पक्राउ गरेको छ।
अमेरिकी नागरिक र ब्यांकिङ ठगी कसूरमा शाहलाई पक्राउ गरिएको सीआईबीका प्रमुख प्रहरी अतिरिक्त महानिरीक्षक (एआईजी) उत्तमराज सुवेदीले बताए। शाहसँगै अन्य पाँच जनालाई पनि पक्राउ गरिएको सुवेदीले बताए।
शाहले अमेरिकी नागरिक जुलिया होडेज रिकेटको अमेरिकी डलर ४६ लाख ४६ हजार ७३७ र नेपाली तीन करोड २२ लाख रुपैयाँ ठगी गरेको सीआईबीले जनाएको छ। कम्प्युटरमा राखिने एन्टिभाइरस सफ्टवेयरको नवीकरणका नाममा सम्पर्क गरेर रिकेटको खातामा पहुँच पुर्याई उक्त रकम रकमान्तरण गरेको सीआइबीको अनुसन्धानमा देखिएको छ। उनले हन्टिङ रिजर्भ अफ नेपाल नामक कम्पनी खोलेरै ठगी गरेको बताइएको छ।
अहिले ठगी आरोपमा पक्राउ गरे पनि शङ्कास्पद रूपमा भित्रिएको धनबारे पनि अनुसन्धान गरिने एआईजी सुवेदीले बताए। राष्ट्र ब्यांकले अमेरिकाबाट शाहको कम्पनीका नाममा आएको रकम रोकिदिएको थियो। त्यसपछि तत्कालीन अर्थमन्त्री जनार्दन शर्माले उक्त रकम फुकुवा गरिदिन राष्ट्र ब्यांकलाई पत्र लेखेका थिए।
हिमालखबर