साँकेतिक तस्बिर
पर्सा । वीरगंजको सिर्सियामा बालकलाई अपहरण गरी हत्या गरेको आरोपमा २ जनालाई प्रहरीले नियन्त्रणमा लिन सफल भएको छ । वीरगंज महानगरपालिका–२५ को सिर्सिया खल्वाटोलाका १४ वर्षीय निरजकुमार पासवानको अपहरण गरी हत्या भएको घटनामा संलग्न रहेको आरोपमा प्रहरीले २ जनालाई पक्राउ गरेको हो ।
पक्राउ पर्नेहरूमा वीरगंज महानगरपालिका–१७ को अलौ बस्ने २४ वर्षीय कृष्णा भन्ने श्यामप्रसाद यादव र धोबिनी गाउँपालिका–१ को घोडादौडपिप्रा बस्ने ३० वर्षीय दिलिपकुमार पटेल रहेको पर्सा प्रहरीले पुष्टी गरेको छ ।
मंसिर ८ गते दिउँसो वीरगंज महानगरपालिका–२५ सिर्सिया खल्वा टोलबाट अपहरित पासवानको शव वीरगंज महानगरपालिका–२५ कै सिर्सिया खल्वाटोलस्थित गुरूकुल पन्ना मेमोरियल ईग्लिस बोर्डिङ स्कुलको पुरानो भवन अगाडि सेफ्टी टंकी भित्र पौष १० गते बेलुका फेला परेको थियो ।
घटनाको अनुसन्धान गर्ने क्रममा उक्त कार्यमा संलग्न भएको प्रमाणीत भए पछि उनीहरूलाई वीरगंज महानगरपालिका–१७ बाट पक्राउ गरेको प्रहरीले जानकारी दिएको छ ।
प्रारम्भिक अनुसन्धानको क्रममा फिरौती रकम असुली गर्न तथा अपहरित पासवानको हात खुट्टा र मुखमा पटी बाँधी राखेकोमा पासवानले डोरी फुकाई भाग्न खोजेकोले अपहरणकारीहरूको पहिचान खुल्न सक्ने डरले उनीहरूले हत्या गरेको खुल्न आएको पर्सा प्रहरीले जनाएको छ ।
पक्राउ परेकाहरु उपर जिल्ला अदालत पर्साबाट अपहरण वा शरीर बन्धक बनाई कर्तव्य ज्यान (ज्यान सम्बन्धि कसूर)मा म्याद थप गरी अनुसन्धान गरिरहेको प्रहरीले जनाएको छ ।