काठमाडौं । सर्वाेच्च अदालतको आदेशबाट छुट्न लागेका चार्ल्स शोभराज ४७ वर्षअघि पहिलोपटक नेपाल आएका थिए । थाइल्यान्डमा विदेशी नागरिकको हत्या गरी उनीहरूकै पासपोर्ट लिएर शोभराज भारत हुँदै नेपाल आएका थिए । नेपालमा पनि उनले नाटकीय शैलीमा एक अमेरिकी र एक क्यानेडियन नागरिकको हत्या गरे । आफू बहुमूल्य गहनाको कारोबार गर्ने व्यापारी भएको भन्दै भ्रममा पारेर नजिकिएपछि एकान्तमा लगेर पैसा र पासपोर्टका लागि शोभराजले हत्या गरेका थिए ।
हत्याकै वेला प्रहरीले उनीलाई पटक–पटक सोधपुछका लागि बोलाएको थियो । तर, नाटकीय शैलीमा उम्किएका थिए । उनकै सहमतिमा लेखिएको ‘लाइफ एन्ड क्राइम अफ चार्ल्स शोभराज’ किताबका अनुसार सोल्टी होटेलमा बसेको झ्यालबाट आफ्ना सामान झारेर मध्यराति भारत भागेका थिए । त्यसको २८ वर्षपछि फेरि नेपाल आउँदा उनी पक्राउ परेका हुन् । १ असोज ०६० मा काठमाडौंको एक क्यासिनोबाट उनी पक्राउ परेका थिए । सुरुमा प्रहरीले काठमाडौंमा भएको हत्या मुद्दामा अभियोजन गरेको थियो । जसमा उनी दोषी ठहर भए । ०७० मा भक्तपुर जिल्ला अदालतमा चलेकोमा दोस्रो मुद्दामा पनि उनी दोषी ठहर भए । दुवै मुद्दामा जन्मकैद सजाय भएको थियो ।
त्यतिवेलाको नेपालको कानुनअनुसार जन्मकैद मुद्दामा अधिकतम २० वर्षसम्म कैद सजाय हुने प्रावधान छ । जसअनुसार आगामी असोजमा उनी छुट्नेमा सर्वाेच्चले उमेर र स्वास्थ्य अवस्थाका आधारमा तत्काल छाड्न आदेश दिएको थियो । तर, प्रक्रिया पूरा नहुँदा बिहीबार पनि उनी छुटेनन् । केन्द्रीय कारागारका जेलर ईश्वरी पाण्डेका अनुसार अदालतबाट पत्रहरू आउँदा ढिलाइ भएको र शुक्रबार अध्यागमन विभागमा बुझाइने बताए ।
nagariknews
