एजेन्सी । विश्वका नै महान फुटबलर ब्राजिलका पेलेको स्वास्थ्य अवस्था थप जटिल बन्दै गएको छ । पेलेलाई क्यान्सर, मिर्गौला र मुटुको समस्या झनै बढेको भन्दै उपचाररत अस्पतालले उनको अवस्था थप जटिल बन्दै गएको जनाएको हो ।
८२ वर्षीय पेलेको ‘मृगौला र मुटुको समस्यासँग सम्बन्धित थप हेरचाह आवश्यक रहेको साओ पाउलोको अल्बर्ट आइन्स्टाइन अस्पतालले भनेको छ । उनको हाल सामान्य वार्डमा उपचार भइरहेको छ ।
उनको केमोथेरापी उपचारको पुनः मूल्याङ्कन गर्न पेलेलाई नोभेम्बर २९ मा साओ पाउलोको अस्पतालमा भर्ना गरिएको थियो । २१ सेप्टेम्बरमा कोलोन ट्युमर हटाउन शल्यक्रिया गरे देखि ८२ वर्षीय पेलेको केमोथेरापी भइरहेको छ ।
उनलाई श्वासप्रश्वासको संक्रमण समेत भएको उनको उपचारमा संलग्न चिकित्सकहरूले जानकारी दिएका छन् । यस महिनाको सुरुमा पेलेलाई जीवनको अन्तिम हेरचाहमा राखिएको रिपोर्टलाई अस्वीकार गर्दै पेलेका छोरी केली नासिमेन्टो र फ्लाभिया अरेन्टेसले उनको स्वास्थ्यको बारेमा प्रशंसकहरूलाई आश्वस्त पार्न खोजेका थिए ।