जनकपुर । कीर्ते हस्ताक्षर गरी बैंकबाट रुपैयाँ झिकेको आरोपमा पक्राउ परेका महन्त जगरनाथ दास ‘वैष्णव’लाई थुनामा राखेर अनुसन्धान गर्न रुपन्देही जिल्ला अदालतले आदेश दिएको छ ।
महोत्तरीको मटिहानीस्थित लक्ष्मीनारायण मठका महन्त वैष्णवलाई थुनामा राखेर अनुसन्धान गर्न अदालतले रुपन्देही प्रहरीलाई चार दिनको म्याद दिएको हो ।
रुपन्देहीका सहायक प्रमुख जिल्ला अधिकारीको किर्ते हस्ताक्षर गरी मेगा बैंकबाट ७० लाख १८ हजार ५ सय १० रुपैयाँ ३५ पैसा झिकेको महन्त वैष्णवमाथि आरोप छ । सो आरोपमा उनलाई मठबाटै महोत्तरी प्रहरीले आइतबार बिहान पक्राउ गरी रुपन्देही पठाएको थियो ।
महन्त वैष्णवले रुपन्देहीको सिद्धार्थनगरमा रहेको मन्दिरको जग्गा गैरकानूनी रूपमा बेचेका थिए । सो मुद्दामा जिल्ला प्रशासन कार्यालय रुपन्देहीले उनको नाममा रहेको बैंक खाता रोक्का गरेको थियो ।
रोक्का रहेको बैंक खाताबाट रुपैयाँ झिक्न महन्त वैष्णवले अर्को अपराध गरेका छन् । उनले सहायक प्रजिअ रामचन्द्र अर्यालको किर्ते हस्ताक्षर गरेको कागजात पेश गरी कार्तिक ४ मा खाता फुकुवा गराएको प्रहरीको अनुसन्धानले देखाएको छ ।
रुपन्देही प्रहरीका अनुसार बैंक खाता फुकुवा पश्चात् उनले ७० लाख १८ हजार ५ सय १० रुपैयाँ ३५ पैसा जनकपुरधामका श्रवण यादवको नाउँमा ट्रान्सफर गरेको देखिएको छ ।