तनहुँ । शुक्ला गण्डकीको प्रगती टोलमा मादक पदार्थ सेवन गरी श्रीमानको हत्या गर्ने एक महिलालाई प्रहरीले पक्राउ गरेको छ । पक्राउ पर्नेमा कास्की जिल्ला पोखरा महानगरपालिका–३० शिशुवा घर भई तनहुँ शुक्लागण्डकी नगरपालिका–४ प्रगति टोल बस्ने ३६ वर्षीया शुसिला बिक भएको प्रहरीले पुष्टी गरेको हो ।
शुसिलाले आफ्नै श्रीमान ४० वर्षीय मनबहादुर नेपालीको ढुङ्गा प्रहार गरी हत्या गरेको तनहुँ प्रहरीले जानकारी दिएको छ । हत्या अभियोगमा शुसिलालाई प्रहरी बुधबार राति प्रहरीले पक्राउ गरेको हो ।
मादक पदार्थ सेवन गरी घरायसी वादविवादमा शुसिलाले श्रीमानको टाउकोमा ढुङ्गा प्रहार गर्दा गम्भीर घाइते भएका थिए । गंभिर घाईते मनबहादुरलाई प्रहरीले उपचारको लागि जिपी कोईराला राष्ट्रिय श्वास–प्रश्वास उपचार केन्द्र बेलचौतारामा लगेकोमा उपचारको क्रममा उनको मृत्यु भएको थियो ।
घटना लगत्तै ईलाका प्रहरी कार्यालय बेलचौताराबाट खटिएको प्रहरीको टोलीले शुसिलालाई पक्राउ गरेको प्रहरीले जनाएको छ ।