गोरखा । गोरखाको अजिरकोट गाउँपालिका घरघरमा पुगेर सामाजिक सुरक्षा भत्ता बितरण गर्न सुरु गरिएको छ । अशक्त र जेष्ठ नागरिकहरुलाई घरघरमा नै पुगेर पालिकाले भत्ता बितरण अभियान थालेको हो ।
सामाजिक सुरक्षा भत्ता बुझ्न दिनभरी पैदल हिडेर आउनुपर्ने बाध्यता रहेको र भत्ता बुझेर घर पुग्दा असुरक्षा भएको भन्दै गाउँपालिकाले लाभग्राहीको घरघरमा पुगेर बैंकिङ्ग प्रणाली मार्फत नै भत्ता बितरण गर्न थालिएको अध्यक्ष दीपक देवकोटाले जानकारी दिए ।
घरघरमा नै भत्ता पाउन थाले पछि गाउँपालिकाको चिसाङ क्षेत्रबाट दिनभरी नै हिडेर बैंकसम्म आउनुपर्ने बाध्यता हटेको सेवा ग्राहीले बताए । गाडी रिर्जभ गर्दा आउदा ३ हजार रुपैयाँ खर्च हुन्थ्यो त्यो पनि बचत हुने भयो उनले भने ।
जनतालाई स्थानीय सरकार छ भन्ने प्रत्याभूती दिलाउन पनि घरघरमा पुगेर सामाजिक भत्ता बितरण गर्न थालिएको अध्यक्ष देवकोटा बताए । लाभग्राहीले घरमै हातहातमा सामाजिक सुरक्षा भत्ता पाउदा स्थानिय पनि खुशी भएको उनले बताए ।
गाउँपालिकाले बैंकसंगको सहकार्यमा बैंकका कर्मचारी, गाउँपालिकाका कर्मचारी, वडा कार्यालयका जनप्रतिनिधि तथा कर्मचारी परिचालन गरी जेष्ठ नागरिक, अपांगता भएका व्यक्ति, असाहाय, एकल महिला लगायतका सवै लाभग्राहीलाई बैकिङ्ग प्रणाली मार्फत नै सामाजिक सुरक्षा भत्ता उपलब्ध गराउन थालेको पालिकाले जनाएको छ ।
अध्यक्ष देवकोटाले आफूले चुनावी प्रतिबद्धता पत्रमा समेत जनतालाई घरघरमा सामाजिक सुरक्षा भत्ता बितरण गर्ने घोषणा गरेकाले सोही प्रतिबद्धता पूरा गर्न पनि यो अभियानको सुरुवात गरिएको जानकारी दिए ।