गोरखा । भोली हुने प्रतिनिधीसभा र प्रदेशसभा निर्वाचनको लागि एकै घर परिवारका ३ जना निर्वाचन अधिकृत भएका छन् । चितवन जिल्लाका उनीहरु आमा, छोरी र बुवा गरी ३ जना निर्वाचनमा अधिकृत भएर खटिएका हुन् ।
आमा सिता दाहाल (परिवार नियोजन अधिकृत) लाई चितवन क्षेत्र नम्बर १ को कालिका नगरपालिकामा हुने निर्वाचनमा सहायक मतदान अधिकृतको रुपमा सरकारले खटाएको छ भने बुवा नारायणप्रसाद काफ्ले (लेखा अधिकृत) लाई नवलपुर जिल्लामा मतदान अधिकृत र छोरी सिमृन काफ्लेलाई कास्की जिल्ला क्षेत्र नम्बर १ को पोखरा महानगरपालिकामा मतदान अधिकृतको रुपमा सरकारले खटाएको हो ।
‘हामी दुवैजनालाई निर्वाचनमा खटाईन्छ भन्ने सोचेका थिएनौँ । झन् छोरी पनि सँगसँगै खटिँदा हामीलाई यो ठूलो अवसर र खुसीको क्षण हो भन्ने लागेको छ’ नारायणले काफ्लेले भने ।
सिमृन गण्डकी प्रदेशको स्वास्थ्य आपूर्ति व्यवस्थापन केन्द्र अन्तर्गतको खरिद, योजना तथा अनुगमन शाखा प्रमुखको रुपमा कार्यरत छिन् । उनी यसअघि स्वास्थ्य तथा जनसंख्या मन्त्रालयको नीति योजना तथा अनुगमन महाशाखामा जनस्वास्थ्य अधिकृतको रुपमा कार्यरत थिइन् ।
आमा र बुवासँग मतदान प्रक्रियाका बारेमा दिनहुँ भिडियो कलमा छलफल हुने गरेको उनी बताउँछिन् । छोरा समीरण काफ्ले चिकित्साशास्त्र अध्ययन गरी हाल तेह्रथुम अस्पतालमा मेडिकल अधिकृतको रुपमा कार्यरत छन् ।
परिवारका सदस्यसँग निर्वाचनको मतदान प्रक्रियाका बारेमा दैनिक भिडियो कुराकानी हुने गरेको सिमृन बताउँछिन् । उनले भनिन्, ‘नियुक्ति पत्र आउने बित्तिकै हामी तीन जना फिल्डमा खटिएका हौँ । यो हाम्रो लागि ठूलो अवसर हो ।’