एजेन्सी । बायर्न म्युनिखले च्याम्पियन्स लिगमा समूह चरणको सबै खेलमा जित निकालेको छ । बायर्नले मंगलबार राति भएको समूह चरणको अन्तिम खेलमा इन्टर मिलानलाई २–० गोलले हरायो ।
समूह ‘सी’ बाट यसअघिनै नकआउट चरणमा पुगिसकेको बायर्नको जितमा बेन्जामिन पभार्डले ३२औं र इरिक म्याक्सिम चोउपु मोटिङले ७२औं मिनेटमा गोल गरेका थिए । जितसँगै शीर्षस्थानमा रहेको बायर्नले समूहमा ६ खेलबाट १८ अंक बनाउन सफल भएको छ ।
दोस्रो स्थानमा रहेको इन्टर मिलान पनि १० अंक जोड्दै नकआउट चरणमा पुगेको छ । ७ अंक बनाएको बार्सिलोना तेस्रो हुँदै च्याम्पियन्स लिगबाट बाहिरिएको छ ।
बार्सिलोना युरोपा लिगमा भने छनोट भएको छ । मंगलबार रातिनै भएको खेलमा बार्सिलोनाले भिक्टोरिया प्लिजेनलाई ४–२ गोलले हराउँदै च्याम्पियन्स लिगमा सुखद अन्त्य गरेको हो । कुनै पनि अंक नल्याएको भिक्टोरिया प्लिजेन अन्तिममा परेको छ ।
यसैगरी समूह ‘ए’ को खेलमा लिभरपुलले नापोलीलाई २–० गोलले हराउन सफल भएको छ । लिभरपुलले नापोलीको अपराजित यात्रामा अन्तिममा आएर पूर्णविराम लगाएको हो । हारेपनि नापोली शीर्षस्थानमा रहँदै अघिल्ले चरणमा पुगेको छ ।
लिभरपुले समूह उपविजेता बन्दै नकआउट चरणमा स्थान बनाएको छ । यस समूहमा ६ अंक बनाएको आयाक्स तेस्रो भएको छ । मंगलबार राति नै भएको खेलमा आयाक्सले रेन्जर्सलाई ३–१ गोलले हराएको थियो । अंकविहिन रेन्जर्स अन्तिममा परेको छ ।
टोट्टनहामाले समूह ‘डी’ को विजेता बन्दै नकआउट चरणमा स्थान बनाएको छ । मंगलबार राति भएको समूहको अन्तिम खेलमा टोट्टनहामले मार्सेलीलाई २–१ गोलले हराउन सफल भयो । यही समूहको अर्को खेलमा फ्रान्कफर्टले स्पोर्टीङ सिपिलाई २–१ गोलले हराउँदै नकआउट चरणमा प्रवेश गरेको छ ।
शीर्षस्थानमा रहेको टोट्टनहामले ६ खेलबाट ११ अंक बनायो । उपविजेता फ्रान्कफर्टले १० अंक जोडन सफल भएको छ । ७ अंक बनाएको स्पोर्टीङ तेस्रो र ६ अंक बनाएको मार्सेली अन्तिममा रहेको छ । त्यसैगरी समूह ‘बी’ बाट एट्लेटिको म्याड्रिड बाहिरिएको छ । एट्लेटिको पहिलो पटक च्याम्पियन्स लिगबाट बाहिरिएको हो ।
मंगलबार राति भएको समूह चरणको अन्तिम खेलमा एट्लेटिको एफसी पोर्टोसँग २–१ गोलले पराजित भएको थियो । जितसँगै शीर्षस्थानमा रहेको पोर्टोले १२ अंक र दोस्रो स्थानमा रहेको क्लब बर्गले ११ अंक जोड्दै अन्तिम १६ मा स्थान बनाएको छ ।
तेस्रो स्थानमा रहेको बायर लिभरकुशेन र अन्तिममा रहेको एट्लेटिकोले समान ५–५ अंक बनाएका छन् । मंगलबार भएको खेलमा लिभरकुशेन र क्लब बर्ग गोलरहित बराबरीमा रोकिएको थियो ।
तस्बिर एएफपी