साँकेतिक तस्बिर
बारा । जिल्लाको कनकपुरबाट ठुलो मात्रामा नेपाली नक्कली नोट सहित १ जना भारतीय युवालाई प्रहरीले पक्राउ गरेको छ ।
प्रहरीले पाएको विशेष सूचनाको आधारमा सिम्रौनगढ नगरपालिका–५ कनकपुरबाट १ हजार दरको ८९५ थान नेपाली नक्कली नोट सहित भारत मोतिहारी पिपरकोठी बस्ने २५ वर्षीय रंजित कुमार मुखियालाई प्रहरीले पक्राउ गर्न सफल भएको छ ।
विशेष सूचनाको आधारमा ईलाका प्रहरी कार्यालय सिम्रौनगढबाट खटिएको प्रहरीको टोलीले नम्बर नखुलेको मोटरसाइकलमा सवार रंजितलाई जाँच गर्ने क्रममा ९ वटा गड्डीमा रहेको उक्त परिमाणको नक्कली नोट सहित पक्राउ गरेको थियो ।
प्रहरीले उक्त नक्कली नोटका सम्बन्धमा गहन अनुसन्धान सुरु गरेको जनाएको छ ।