नारायणगढ । अविरल वर्षाका कारण नारायणी नदीमा आएको बाढीले सतर्कताको तह पार गरेको छ ।
जल तथा मौसम विज्ञान विभागको बाढी सूचना केन्द्रले आज बिहान ७ः३० बजे दिएको जानकारीअनुसार नारायणगढ र देवघाटमा रहेको बाढी मापन केन्द्रमा जल सतहले सतर्कताको तह पार गरेको हो ।
नारायणगढमा बिहान ७ बजे पानीको सतह १०.६१ मिटर पुगेको छ । ९.८ मिटर पुगेपछि सतर्कता तह पार भएको मानिन्छ । नारायणगढ क्षेत्रमा बिहान ६ बजे नै पानीको सतह ९.८ मिटर पुगेको थियो । ११ मिटर पुग्नासाथ उच्च खतरा मानिन्छ ।
यस्तै देवघाट मापन केन्द्रमा पनि पानीको बहाव ७.४ मिटर पुगेको छ । ७.३ मिटर पुगेपछि सतर्कता तह पार हुन्छ । देवघाटमा ९ मिटर पानीको बहाव पुगेपछि उच्च खतराको सङ्केत मानिन्छ ।
नारायणीमा पानीको बहाव यो वर्षकै उच्च रहेको चितवन जिल्ला प्रशासन कार्यालयले जानकारी दिएको छ । पानी निरन्तर परिरहेकाले बाढीको सतह बढ्ने क्रम जारी रहेको छ । नारायणीमा बहाव बढेपछि पश्चिम चितवनका नदी तटीय क्षेत्र उच्च जोखिममा परेका छन् ।
चितवन र नवलपरासीका तटीय क्षेत्रमा हुनेले आज साँझसम्म उच्च सतर्कता साथ सुरक्षित स्थानमा रहन केन्द्रले अनुरोध गरेको छ । चितवन, नवलपरासीलगायत जिल्लामा रातभर पानी परेकाले नारायणी तटीय क्षेत्रका बासिन्दालाई सचेत रहन जिल्ला प्रशासन कार्यालयले आग्रह गरेको छ ।
कार्यालयका सूचना अधिकारी आनन्दवंश न्यौपानेका अनुसार जिल्लाका सबै सुरक्षा निकायलाई ‘अलर्ट’ रहन निर्देशन दिइएको छ ।
